Manifestación contra a Lei de Depredación de Galiza

Esta mañá tivo lugar a manifestación que tiñamos prevista no noso calendario de mobilizacións contra a Lei de Depredación de Galiza.

Non pense ninguén que este é o final do noso traballo respecto a esta lei. É, máis ben, o principio.

Seguiremos organizando actividades ao respecto, entre elas, charlas para dar a coñecer o contido da Lei e as ameazas que para o noso territorio se desprenden dela.

Deixámosvos a continuación o manifesto que en relación á Lei de Depredación foi lido hoxe na Quintana. Leuse tamén outro manifesto relativo aos lumes, pois, como saberedes, na manifestación confluíu a Lei de Depredación co tema dos lumes, que é unha das consecuencias de leis como esta, que desarticulan o rural.

 

A Quintana durante a lectura do manifesto (Imaxe de Galiza Contrainfo)

Contra a Lei de Depredación de Galiza.
(Un manifesto do non ao seu non; do si a outra posíbel Galiza)

Lei de Fomento da Implantación de Iniciativas Empresariais.
Un nome de certo complexo para unha intención ben simple.
Depredación de Galiza.
Aprobada mentres aínda fumegaban os nosos montes, pola vía rápida, furtando o debate e impoñendo a súa maioría, como se os votos fosen un cheque en branco ou un arma contra os intereses comúns.
LFIIE. Baixo este barullo de siglas o que hai é un apaño de elites políticas e económicas que queren facer deste lugar un espazo extractivo para o capital globalizado. As grandes empresas mineiras, eléctricas ou forestais a obter máis facilidades para o seu negocio:
maior acceso á terra e menos normas sociais e ambientais.
Liberdade de empresa, eficacia, facilidade para o acceso ao solo, simplificación normativa e tributaria… Estes son os principios da lei. Será que ninguén recordou incluír entre eles a garantía dos dereitos sociais e laborais, o respecto ás comunidades locais ou conservación da nosa natureza? Por iso é lei de depredación.
Unha lei que é un elo máis da versión neoliberal do capitalismo, coma os tratados de libre comercio internacional, para eliminar trabas ao negocio. E que é unha traba? ollade ao voso arredor… esas trabas somos nós, os nosos dereitos e dignidade, a nosa natureza.
Mais aquí estamos. Minoría absoluta resolta a non calar. Que triste maioría a de quen precisa facerse trampas até a si mesmo. Mentir e ocultar coa palabra incluso dende o poder do número. Triste poder o poder que así se mantén.
Nós non lles outorgaremos os números nin os significados e aquí, hoxe, denunciamos esta lei aprobada polo Partido Popular de Galicia.
– Porque é un texto que afecta ámbitos estratéxicos, transformando unha morea de leis anteriores como a da minaría, a de montes, a eólica ou a do solo.
– Porque non sirve para a necesaria defensa dun mundo rural vivo, con capacidade de tomar iniciativas propias e sustentábel, senón que facilita o espolio dos seus recursos naturais sen ningunha contrapartida para as comunidades.
– Porque facilita os procesos de expropiación forzosa e acaparamento de terras en mans das empresas, mediante figuras como a de utilidade pública ou os proxectos de especial interese.
– Porque reduce tanto os prazos para a emisión de informes en materia ambiental, que fai case imposíbel o traballo do persoal técnico encargado de redactalos, e porque vencido o prazo o informe desfavorábel non é tido en conta.
– Porque recorta e mesmo suprime os mínimos procesos de participación pública.
– Porque furta información á poboación sobre iniciativas empresariais que poden ter unha grave afección nas súas vidas, permitindo que as mineiras decidan que documentación consideran reservada.
– Porque reduce o papel dos concellos, a instancia administrativa máis próxima á veciñanza, para velar polo seu propio territorio.
– Porque fai prevalecer o aproveitamento industrial do monte fronte aos tradicionais e comunitarios.
– Porque estende o emprego de meras declaracións responsábeis para a plantación de especies forestais como o eucalipto, mesmo en masas con presenza de árbores autóctonas.
– Porque suprime a necesaria autorización de Medio Ambiente para os aproveitamentos madeireiros en zonas protexidas, e ameaza ao patrimonio cultural dos nosos montes.
– Porque suprime criterios como o respecto á natureza á hora de outorgar os dereitos de construción dun parque eólico.
– Porque outorga boa parte da capacidade decisiva sobre cuestións ambientais e relacionadas co territorio á Dirección Xeral de Enerxía e Minas.
Cando escriben “Galicia” pensan “negocio”. Cando cidadanía, consellos de administración. Cando pechan unha porta, abren unha fiestra na gran empresa privada.
Porque o cargo de hoxe pode ser o posto de mañá. Porque queren a Galiza coma unha mina, deprédannos.
Mais aquí estamos. Se cadra nós, non tan minoría. Se cadra a maioría non tan absoluta fóra dos seus muros. Non imos entregarlles a palabra, nin a terra. Porque só se compra o que se vende, pero a nosa resistencia é a negación do voso afán. É a vosa pequena derrota diaria. Mentres sigamos aquí, a non traficar o futuro.
Non queremos esta Lei de Fomento de Implantación de Iniciativas Empresariais.
Non queremos esta Lei de Depredación de Galiza.
Nin lumes nos montes, nin fume nos despachos.

Terra viva e vida digna para todas!

Compostela, a 22 de outubro de 2017

Save

Save

Save

Save

Save

Save

Save

Concentración diante do Parlamento

Un numeroso grupo de persoas acudiu o pasado venres á concentración convocada pola da Plataforma contra a Lei de Depredación.

A concentración tivo lugar diante do Parlamento Galego, onde nese momento tiña lugar o debate sobre o estado da Autonomía.

As persoas concentradas manifestaron o seu rexeitamento a unha lei que supón a desregulación absoluta de sectores como o mineiro ou o eólico, convertendo o noso rural nunha especie de pastel a repartir entre os oligopolios.

Recordamos que o noso calendario de mobilizacións continúa o día 22, cunha manifestación que se celebrará en Compostela, saíndo da Alameda.

A mina de San Rafael ameaza con deixar sen auga potable centos de vivendas e granxas en Touro e O Pino e pon en risco directo a vida de máis de 200 persoas

A veciñanza de Touro e O Pino presentou hoxe 500 alegacións contra un proxecto mineiro que tornaría inhabitable a zona por contaminación de acuíferos e traídas por metais pesados altamente tóxicos

Unha comitiva de veciños e veciñas de Touro e da plataforma contraMINAcción acudiu onte, 3 de outubro, até o Rexistro Xeral da Xunta de Galicia para facer entrega de 500 alegacións contra o proxecto da mina de San Rafael, que afecta unha ampla zona dos termos municipais de Touro e O Pino. Tamén desde O Pino se presentaron alegacións*. Son moitas as persoas que se interesaron pola posibilidade de presentar alegacións en ambos concellos, polo que ao longo desta semana agárdase que o número destas ascenda considerablemente.
A pouco que se afonde nas alegacións presentadas, comprobamos que este proxecto impulsado pola sociedade Cobre San Rafael SL** ameaza seriamente a habitabilidade e futuro dos dous concellos afectados polo enorme e irreversible impacto que terá a actividade mineira nos recursos hídricos e económicos da zona (achégase documento de alegacións).
Sen minimizar outras consecuencias graves do proxecto da mina de San Rafael, o impacto máis grande viría dado polas drenaxes ácidas da actividade mineira, que xa é algo que vén sufrindo de vello a veciñanza da zona. De feito, un estudo que analiza estas drenaxes entre 1974 e 1988, di que “en apenas 14 anos, a anterior fase de explotación provocou alteracións ambientais críticas, con cortas profundas, paredes verticais, grandes escombreiras de materiais xeradores de drenaxes ácidas de mina, unha extensa balsa de lodos, por súa vez causantes de problemas continuos de contaminación de augas e solos, por augas de drenaxe hiperácidas que se verten de forma continua na cunca do Ulla e nos acuíferos subterráneos. Que ante a xeración continua de emisións con altas concentracións de metais pesados, a administración non teña obrigado ás concesionarias a instalar unha planta de tratamento
destas emisións, ou teña practicado calquera sanción, deixa en evidencia a súa incapacidade para entender a gravidade do fenómeno”.
O estudo da propia empresa recoñece concentracións significantes de metais pesados como cadmio, cobalto, cobre, molibdeno, antimonio, selenio e cinc. Porén, non sabemos se por erro ou intencionadamente, omite no seu estudo a violación para substancias perigosas prioritarias como o cadmio ou o mercurio, presentando de xeito errado os límites das Normas de Calidade Ambiental marcados no Real Decreto 817/2015, de 11 de septiembre, por el que se establecen los criterios de seguimiento y evaluación del estado de las aguas superficiales y las normas de calidad ambiental.

Veciños de Touro e O Pino presentando alegacións

Extracción de máis de 100 millóns de metros cúbicos de materiais

A actividade da mina de San Rafael crearía unha xigantesca escombreira onde se pretenden acumular máis de 80 millóns de metros cúbicos dos residuos potencialmente máis contaminantes (ocupando 484.000 m2 e cunha cota de coroamento de 510 m). Nas alegacións denúnciase que “a acumulación neste punto garante a contaminación dos mananciais presentes na zona a ocupar, e que subministran aos núcleos de poboación próximos e á propia traída municipal que fornece boa parte do concello. A escombreira está a menos de 500 metros dos primeiros núcleos de poboación e a menos de 1 km dos núcleos do Castelo San Saturniño, sen ter en conta a afectación ao subministro de auga destas poboacións”.
A maiores, faríanse tamén dúas balsas de refugallos, denominadas no proxecto e de maneira eufemística “laguna de Arinteiro y Vieiro”, que albergarían 69.000 toneladas de lodos tóxicos (50.000 metros cúbicos) e estarían situadas a menos de 200 metros de Arinteiro (42 habitantes) e a menos de 1 km de Tribas (20 habitantes), Goleta (100 habitantes), Bravos (14 habitantes), Cruz de Méndez (23 habitantes) ou Torreis. O proxecto da empresa dálle categoría de falla “Moi alta” porque estima que hai menos de 100 habitantes a poboación que se atopa en risco de morte; en realidade, esa poboación supera as 200 persoas e a cualificación debería ser “Extrema” e “Permanente”. A este respecto, as alegacións din que “a realización do proxecto non só supón un risco extremo e permanente para a vida das persoas residentes nas poboacións próximas, máis non caso de núcleos de poboación como Arinteiro, unha condena sumaria á desaparición do lugar, tornando imposíbel a vida nel, mesmo despois da conclusión do proxecto”.
Este apartado conclúe que “os enormes riscos asociados á extracción de máis de 100 millóns de metros cúbicos de materiais que producirán de forma constante drenaxes ácidas de mina capaces de contaminar as augas superficiais e subterráneas con metais pesados, incluídas substancias perigosas prioritarias, durante un longo período de tempo, mesmo con posterioridade ao peche da eventual explotación, torna temeraria a autorización do proxecto na súa actual formulación. Isto prodúcese ademais non nunha zona illada e despoboada, senón nunha área inmediata e contigua a numerosos núcleos de poboación que obteñen o seu subministro de auga potábel da área de afectación e ademais dentro dunha cunca fluvial como a do Ulla, que abastece a millares de persoas e sostén a economía de comarcas enteiras”.

Afectación ás traídas de auga

Tralo devandito, folga dicir que a destrución e contaminación de acuíferos serán amplas, como xa aconteceu co a explotación mineira desta zona nos anos 70 e 80, e “tornará a habitabilidade do contorno especialmente difícil, se non imposíbel”. Aínda que só consta unha captación de auga para abastecemento humano na zona afectada, o depósito municipal do Monte Arinteiro que fornece centos de veciños e veciñas; existen ducias de captacións que fornecen casas, granxas e núcleos de poboación enteiros que non están rexistradas en Augas de Galicia e que tamén quedarían contaminadas ou destruídas nunha zona que xa padece problemas de restrición e fornecemento de auga potable por mor do impacto das actividades mineiras do pasado (detállanse no documento de alegacións).

Afectación crítica a núcleos de poboación

O proxecto pretende localizar varios depósitos de residuos mineiros, perigosos por tratárense de materiais xeradores de drenaxes ácidas con altas concentracións de metais pesados, ao carón de diversos núcleos de poboación, sen apenas separación nalgúns casos. Téñase en conta que as distancias aproximadas desde os diversos depósitos de residuos mineiros ata os núcleos de poboación son: Arinteiro (80 metros); Os Torreis de Arriba (100 metros); Os Torreis de Abaixo (200 metros); Castelo (400 metros); Tribas (450 metros); As Goritas (600 metros); Eiresa (650 metros); Goleta (700 metros); Bravos (790 metros); Cruz de Méndez (800 metros); San Saturniño (800 metros); etc. Por só citar os que se encontran a menos de 1 km. Sinálese ademais que as capitais (e maiores núcleos de poboación) dos municipios de Touro e do Pino se encontran en ambos os dous casos a 1,5 km do perímetro da explotación.
Ademais, destruiríanse moitas vías de comunicación construídas en procesos de concentración parcelaria e as estradas que comunican a parroquia de Loxo con Arca e Santiago de Compostela, e a que vai a Pedrouzo pola Reigada.

Un grupo de persoas protagonizou unha concentración diante do Parlamento galego

Destrución de muíños do século XVIII e do Camiño Real

O estudo de impacto medioambiental da empresa di que a zona afectada non conta cun patrimonio etnográfico e arquitectónico salientábeis. Porén, no rego das Pucheiras existen diversos muíños que se remontan ao século XVIII, en bo estado de conservación, algún dos cales sería totalmente sepultados pola escombreira proxectada. Tamén se destruiría o Camiño Real da Feira do 20 e posíbeis elementos arqueolóxicos identificados na tradición oral aínda conservada, e que fan referencia a “casas dos mouros” que ben poderían ser continuación dos complexo megalíticos do Cotiño (8 túmulos) e da Croa de Pereiro (5 túmulos), na parroquia de Loxo. Ademais, no pasado, os traballos de rexeneración medioambiental das anteriores explotacións mineiras destruíron boa parte do Castro de Copa.

Varias granxas quedarán sen auga e sen base territorial

Nas alegacións referentes ao abastecemento de augas presentáronse algunhas das explotacións agrogandeiras que se verán directamente afectadas polo fin das súas fontes de auga potábel, subministro que dificilmente poderá ser substituído por unha traída municipal de insuficiente capacidade. Pero é que ademais da auga, a actividade mineira prevista implicará a destrución a perpetuidade da base territorial destas e outras explotacións, co agravante de que as terras a destruír forman parte de procesos de concentración parcelaria, que determinan a utilidade pública destes terreos con fins agrarios ademais da función social das propiedades, coa necesidade de que estas terras cultivables non queden abandonadas, se manteña e se conserve a súa capacidade agrícola, se aproveiten axeitadamente os seus recursos en consonancia cos plans de aproveitamento de cultivos ou forestal recollidos no acordo de concentración.
Estamos a falar dunha actividade económica multixeracional e sustentábel, de modo que oimpacto destrutivo non se limita ao período de explotación, senón que afecta á viabilidade agrícola, agrogandeira e forestal da zona por séculos. Téñase en conta que estamos a falar en algúns casos de explotación con un alto número de cabezas de gando (até 200 cabezas), nas que hai mozos e mozas recentemente incorporados á actividade agraria, e que realizaron nos últimos anos constantes investimentos nas súas explotacións para a súa modernización e ampliación. En síntese, o proxecto proposto é incompatíbel coa continuidade da actividade agrogandeira da zona e determinará o peche de numerosas explotacións, a perda de postos de traballo e a destrución a perpetuidade da base territorial na que se sustentaría a viabilidade de explotacións futuras.

 

*Podes descargar as nosas alegacións para presentar, témolas en texto e en pdf. 

**En realidade, esta sociedade é a punta do iceberg dun escuro entramado empresarial no que estarían os dereitos mineiros na zona que tiveron antano Explotaciones Gallegas e Minas Metálicas del Noroeste, que se unificaron en Explotaciones Gallegas del Cobre SL; e a participación de multinacionais estranxeiras como Atalaya Mining. Este ocultamento da verdadeira identidade dos inversores que queren explotar a mina de San Rafael favorecería a elusión de responsabilidades diante do inevitable impacto socioeconómico e medioambiental da actividade mineira na zona (ver páxinas 1 e 2 das alegacións).

Save

Manifesto contra a Lei de Depredación de Galiza. (Lei de Fomento de Implantación de Iniciativas Empresariais -LFIIE-)

LFIIE

Un nome de verdade complexo para unha intención ben simple.

LFIIE

Fume de siglas para agocharse.

LFIIE

A proposta dun oco para a nosa terra.

LFIIE

Lei de Depredación de Galiza.

LFIIE

Mais a verdade non é unha mentira percutida.

A verdade non se fala nesa lingua, non está nos seus petos nin será decretada.

Non existe verdade nesta tinta LFIIE.

Non existe nestes momentos en Galicia unha preocupación compartida por axentes sociais e grupos políticos relativa á necesidade de tomar medidas para que a implantación empresarial na nosa Comunidade resulte aínda máis atractiva para os investidores.”

O que existe en Galiza é un apaño de elites políticas e económicas que queren facer deste lugar un espazo extractivo para o capital globalizado. Existen as grandes empresas mineiras, eléctricas ou forestais a querer máis facilidades para o seu negocio: maior acceso á terra e menos normas sociais e ambientais.

E di o texto:

Que ningunha traba administrativa poida obstaculizar o crecemento de Galicia nin minguar a súa capacidade de competir coas moi favorables condicións de implantación empresarial que ofrecen outras zonas limítrofes”.

E cando escriben Galicia a verdade perde algo máis de alento. Cando Galicia e grandes empresas que operan en Galicia son o mesmo para quen goberna, comprendemos mellor quen goberna. Comprendemos ese seu “desexo apaixonado de traballo servil e máis barato”, esa fame de nós e da nosa terra. Mais “nesta terra temos o que paga a pena a vida”.

LFIIE:

Para a redacción desta proposta “promoveuse a máis ampla participación da cidadanía en xeral”. Frases depredadas da verdade. Verdades LFIIE…

… E principios LFIIE para a implantación das iniciativas empresarias:

a) Liberdade de empresa.

b) Eficacia, eficiencia e coordinación das Administracións públicas para fomentalas.

c) Facilidade para o acceso ao solo.

d) Calidade das áreas empresariais e responsabilidade pública e privada no seu mantemento.

e) Simplificación da normativa autonómica e municipal.

f) Simplificación tributaria e incentivos fiscais ás empresas.

Nin nos principios nin nos finais desta proposta está a garantía dos dereitos sociais e laborais, do respecto ás comunidades locais, da conservación da nosa natureza. Nin nos principios nin nos finais. Deprédannos por lei.

Unha lei que é un elo máis da versión neoliberal do capitalismo, coma os tratados de libre comercio internacional, co fin de eliminar límites ao negocio, mesmo se eses límites teñen que ver con dereitos básicos das persoas ou a conservación do medio ambiente e os recursos naturais.

Así que aquí estamos. Minoría absoluta resolta a non calar. Triste maioría absoluta a de quen precisa facerse trampas até a si mesmo. Mentir e ocultar coa palabra mesmo dende o poder do número. Triste poder o poder que así se mantén.

Nós, minoría absoluta, non cremos na linguaxe LFIIE nin nas súas matemáticas. Non outorgaremos os números nin os significados e aquí, hoxe, denunciamos esta proposta do Partido Popular de Galicia,

– Porque é un texto que afecta ámbitos nada casuais, transformando unha morea de leis anteriores como a da minaría, a de montes ou a eólica.

– Porque non sirve para a necesaria defensa dun mundo rural vizoso, con capacidade de tomar iniciativas propias e sustentábel, senón que pola contra incide no espolio dos seus recursos naturais e territorio sen ningunha contrapartida para as súas comunidades.

– Porque facilita os procesos de expropiación forzosa e acaparamento de terras en mans das empresas, mediante figuras como a declaración de utilidade pública ou o proxecto de especial interese.

– Porque reduce tanto os prazos para a emisión de informes en materia ambiental que fai case imposíbel o traballo do persoal técnico encargado de redactalos.

– Porque recorta e mesmo elimina procesos de participación pública, necesarios xa que así o marca a lexislación europea mais, sobre todo, porque eliminalos supón un novo deterioro do concepto de cidadanía e da calidade democrática das institucións.

– Porque non só limita os tempos ao máximo nas tramitacións ambientais e exposición pública, senón que en caso de vencer o prazo de emisión dos informes considera en xeral isto como silencio positivo para os proxectos, mesmo se o documento final é desfavorábel.

– Porque furta información á poboación sobre iniciativas empresariais que poden ter unha grave afección nas súas vidas, permitindo por exemplo ás mineiras decidir que documentación consideran reservada.

– Porque reduce o papel dos concellos, a instancia administrativa máis próxima á veciñanza, á hora de velar polo seu propio territorio.

– Porque fai prevalecer o aproveitamento industrial do monte fronte aos tradicionais e comunitarios.

– Porque estende o emprego de meras declaracións responsábeis para aproveitamento de especies forestais como o eucalipto, mesmo en masas con presenza de árbores autóctonas.

– Porque suprime a necesaria autorización de Medio Ambiente para os aproveitamentos madeireiros en zonas protexidas e ameaza ao patrimonio cultural dos nosos montes.

– Porque suprime os criterios de respecto á natureza á hora de outorgar en concorrencia os dereitos de construción dun parque eólico.

– Porque outorga boa parte da capacidade decisiva sobre cuestións ambientais e relacionadas co territorio naos organismos que acollen ás propias actividades económicas, nomeadamente á Dirección Xeral de Enerxía e Minas.

Cando escriben Galicia pensan negocio. Cando cidadanía, consellos de administración. Cando pechan unha porta, abren unha fiestra na gran empresa privada. Porque o cargo de hoxe pode ser o posto de mañá. Porque queren a Galicia coma unha mina, deprédannos.

Mais aquí estamos. Se cadra nós non tan minoría. Se cadra a maioría non tan absoluta neste mundo exterior. Non imos entregarlles a palabra. O dereito á palabra terra.

Eran nosos o tempo e os soños,

eran nosos porque non tiñan prezo

porque eran coma o vento e a chuvia.

Pero os espazo para soñar e o transcorrer do tempo,

onde caia a chuvia e sopraba o vento,

adquiriu un prezo e xa non foi noso.

Porén, só se compra o que se vende e aquí temos o que merece a pena na vida. Así que,

Pasaxeiros entre palabras fugaces

cargade os vosos nomes e marchade

e levade os vosos reloxos do noso tempo e marchade

e “depredade” o que queirades do azul do mar e da area da memoria

e “depredade” o que queirades das fotos, para que saibades

que nunca saberedes

como unha pedra da nosa terra construíu o ceo.

Vós depredar,

vós LFIIE, decretos, business

vós ocultación, fume, urxencia no lucro.

Vós sentados na poltrona dos pazos

nas xuntas directivas.

Nós de pé, aquí, sostendo a palabra polo seu lado exacto, mesmo se doe. Sodes depredadores de nós.

Non á LFIIE.

Non á Lei de Depredación de Galiza.

Terra viva e vida digna para todas!

*Citas de:

Mahmud Darwix, Eduardo Romero e X. H. Rivadulla

Reunión de colectivos contra a Lei de Depredación de Galiza

Na tarde de onte tivo lugar en Compostela, no local do Sindicato Labrego Galego, unha xuntanza de colectivos para tratar a problemática da tramitación pola vía de urxencia do Proxecto de Lei de Fomento de Implantación de Iniciativas Empresariais de Galicia. Esta lei vai supor unha auténtica Lei de Depredación de Galicia xa que pretende desregular ámbitos como o eólico, forestal, mineiro, usos hidráulicos, cooperativas, etc, constituíndo a aprobación de varias leis nunha, tratando de eliminar calquera debate público sobre temas que requirían dun amplo consenso social e político. Supón, ademais, unha ameaza absoluta ao conxunto da poboación que podería verse sometida a un uso abusivo e xeralizado da lei de expropiación para favorecer iniciativas privadas de grandes empresas coa protección do goberno galego.

Cunha lei como a que se pretende aprobar será practicamente imposíbel facer defensa do patrimonio ambiental galego, tal e como colectivos sociais e ambientais veñen facendo desde hai anos, como foron os casos dos proxectos da mina de Corcoesto, os proxectos de extracción da Limia ou da Terra Chá ou, fóra do ámbito da minaría, a lei de acuicultura, etc.

A información ambiental ficará secuestrada, dereito que na práctica se elimina, deixando en mans das empresas mineiras que decidan que é secreto industrial, nun claro conflito coa lexislación europea e española. Elimínanse controis ambientais e acúrtanse os prazos para evitar todo tipo de alegacións da cidadanía.

Contraminacción considera que é unha auténtica falacia, argumentar que esta lei se promove para tratar de competir cos investimentos empresariais no norte de Portugal. Tendo en conta que toda a desregulación vai dirixida á sectores primarios e extractivos, ditas actividades dependen fundamentalmente da existencia ou non de recursos e, en menor medida, do marco normativo.

A xuntanza de onte serviu para poñer en común as preocupacións dos distintos colectivos sociais respecto o proxecto de lei e acordar iniciativas de mobilización contra a mesma.

Participaron nesta primeira xuntanza representantes de: ADEGA, CIG, Comisión contra as minas da Terra Chá, Comisión de Medio da Gentalha do Pichel, ContraMinAcción, Equo, Organización Galega de Comunidades de Montes, Plataforma para a Defensa de Corcoesto e Bergantiños, Sindicato Labrego Galego, Verdegaia e Véspera de Nada.

Na tarde do sábado, celebrouse unha nova xuntanza en Vigo para tratar o mesmo tema. Asistiron á mesma representantes de Galiza Contrainfo, A Revolta, ContraMINAcción, Comuneiros de Cabral, CS Faísca, Luita Verde, A Ría non se Vende e Verdegaia.

Chamamento aos colectivos galegos

Bosquexo de urxencia para unha campaña contra a L.F.I.E. (Casdeiro)

O PP ven de presentar hai uns días ao Parlamento galego a proposición de “Lei de fomento da implantación de iniciativas empresariais”.

Esta proposición de lei, que se tramita (sen causa algunha que o xustifique) pola vía de urxencia, podería ser chamada máis xustamente “Lei de depredación da Galiza”, ou “Lei de indefensión ambiental”, xa que o que fai é poñer o noso territorio en bandexa ás empresas mineiras e eólicas, eliminando garantías ambientais e reducindo prazos nas tramitacións.

É un chover sobre mollado, pois reduce prazos que xa de por si eran claramente insuficientes para termos unha mínima garantía de participación pública; e permite saltar trámites ambientais que xa eran de seu flexibles de máis.

Na práctica vén a reducir as ferramentas de defensa das comunidades afectadas ou os valores naturais fronte ás empresas, deixando ver ás claras de que parte se sitúa a administración en potenciais conflitos de interese.

Con esta lei en marcha, tería sido moito máis difícil a loita contra proxectos como o de Corcoesto.

A Xunta sitúase pois do lado dos intereses do negocio privado, en concreto os dos grandes grupos empresariais, fronte aos da poboación e o medio natural (sempre que estes colidan, o que sucede cada día tal como funcionan as cousas).

Temos pouco tempo para poder mover a única vía que queda neste contexto de maioría absoluta e prazos urxentes, a da presión social, para que cando menos isto sexa coñecido e poida darse algo de debate público.

Desde a Rede Contraminación facemos un chamamento urxente aos movementos sociais para convocalos a unha reunión que nos permita artellar estratexias conxuntas contra este despropósito. O tema é moi grave e necesita dunha resposta rápida e contundente de parte do tecido asociativo galego.
Por favor, tentade asistir á reunión convocada para este tema O venres 22 ás 18:00h no local do Sindicato Labrego, Rúa de Ofelia Nieto, 13-23, baixo, 15705 Santiago de Compostela.

Difundide, por favor!!

Save

Non ao proxecto de Lei de Fomento Empresarial!

ContraMINAcción chama ás organizacións sociais de Galiza a paralizar o proxecto de Lei de Fomento Empresarial

Esta semana, os grupos políticos da oposición no Parlamento de Galicia mantiveron unha xuntanza para analizar o contido do proxecto de Lei de Fomento das Iniciativas Empresariais impulsado polo Partido Popular. A esta xuntanza asistimos representantes da nosa rede, e puidemos coñecer as graves repercusións que podería ter para Galiza a aprobación deste proxecto.

En primeiro lugar, trátase dun proxecto de lei que pretende, baixo a falsa intención de fomentar iniciativas empresariais, desregular diferentes ámbitos como o eólico, forestal, mineiro, hidráulico, cooperativo, etc. Este proxecto de lei equivalería á aprobación de varias leis nunha e conseguiría eliminar calquera debate público sobre temas e cuestión moi sensibles para a sociedade galega que requirían dun amplo consenso social e político.

De ter existido anteriormente unha lei como esta de Fomento das Iniciativas Empresariais, non tería sido posible frear atentados ambientais como o proxecto da mina de Corcoesto, ou a extracción de feldespatos na Limia ou seixo da Terra Chá. Fóra do ámbito mineiro, tampouco tería sido posible impedir a aprobación da Lei de Acuicultura.

Un dos problemas principais do proxecto ten que ver co acceso a información ambiental, dereito que na práctica se elimina, deixando en mans das empresas que decidan que é secreto industrial, nun claro conflito coa lexislación europea e española. Elimínanse controis ambientais e acúrtanse os prazos para evitar todo tipo de alegacións da cidadanía. Particularmente, procúrase minimizar a intervención e capacidade de resposta da administración de augas (nomeadamente Augas de Galicia), nun momento no que a escaseza de recursos hídricos e o cambio climático pon en perigo o acceso básico en numerosas localidades.

A lei di que se promoveu unha ampla participación social para a súa redacción pero se ignora cando e como se deu dita participación.

ContraMINAcción considera que é unha auténtica falacia argumentar que esta lei se promove para tratar de competir cos investimentos empresariais no norte de Portugal. Tendo en conta que toda a desregulación vai dirixida a sectores primarios e extractivos, ditas actividades dependen fundamentalmente da existencia ou non de recursos e, en menor medida, do marco normativo. En calquera caso, a existencia de controis normativos e administrativos para a explotación de recursos que requiren de autorización ou concesión pública, serven para garantir que os beneficios colectivos prevalezan sobre os privados. Pola contra, a desregulación é unha forma de facer prevalecer os dereitos privados das grandes empresas sobre os colectivos ou os privados dos propietarios de terras agrarias ou montes. Faise, deste modo, unha aposta decisiva pola expropiación forzosa en favor de negocios privados coa protección do Goberno Galego.

Por todo o devandito, ContraMINAcción fai un chamamento a tódalas organizacións sociais de Galiza para tratar de organizar diversas iniciativas informativas e de mobilización para frear este proxecto de lei.

A sentenza xudicial di que a licenza concedida polo Concello de Triacastela a Cementos Cosmos debe ser revogada.

  • A Asociación Sociocultural O Iribio solicitara a súa anulación.

  • A sentenza recoñece que a licenza concedida a Cementos Cosmos non é válida.

  • A rede ContraMINAcción amosa a súa satisfacción, pero pide que se cumpra a lei e que se respecte o medio ambiente, os bens culturais e as persoas.

A sentenza confirma que “la licencia impugnada está viciada de nulidad radical y debe ser revocada”. Os motivos son varios e a sentenza exponos con claridade.

O concello de Triacastela concedeu unha licenza mineira a Cementos Cosmos e segundo a sentenza todo apunta a que intentou pasar por riba da lei.

A canteira Don Isidro 6043, explotada por Cementos Cosmos, está situada no lugar de Monte Penedo, parroquia de Vilavella, Concello de Triacastela, en Lugo. Alí extraen caliza mediante a técnica extractiva de banqueo descendente e arranque con perforación e voadura (explosión).

A demanda expón motivos legais contundentes polos cales o permiso concedido polo concello de Triacastela non es válido e debe anularse.

A canteira de Cosmos está poñendo en grave perigo a Cova de Eirós

Os principais motivos son:

-A ausencia dunha declaración de impacto ambiental favorable ao proxecto. Cementos Cosmos presentou un proxecto mineiro anacrónico -concretamente do ano 1978-. O seu único plan de restauración referíase á antiga explotación mineira.

-A falta dos permisos preceptivos por parte da Xunta de Galicia. Isto é debido a que o solo afectado polo proxecto mineiro de Cosmos es maioritariamente “rústico de especial protección agropecuaria e de interese patrimonial, histórico ou artístico no ámbito territorial”.

Ademais, incumpriuse o procedemento legal, omitindo trámites como a publicación obrigatoria en canles oficiais.

Outros motivos para a revogación dos permisos ao proxecto mineiro son a desprotección dos bens de valor cultural existentes no lugar, entre os que cabe salientar a Cova de Eirós, onde se atoparon gravados rupestres de tal importancia que foi cualificada como a “Atapuerca galega”, ademais de outros vestixios do Paleolítico.

Para a subdirección Xeral de Protección do Patrimonio Cultural, a área entra dentro da “categoría de especial protección do patrimonio”. A área de protección a preservar arredor da cova é moito maior que a que se pretendía dar: 200 m fronte 50 m.

Outra tanta preocupación esperta a dificultade para o uso de camiños públicos que Cosmos, nunha práctica habitual en empresas mineiras, utilizan e pechan ao paso veciñal, como se fosen seus.

A todas estas razóns para rexeitar o proxecto mineiro, súmase o feito de que a mineira non notificou convenientemente aos propietarios dos terreos afectados polo seu proxecto.

As 20 organizacións que facemos parte de ContraMINAcción e que vimos dando seguimento desde 2013 ao desempeño administrativo das autoridades en torno aos proxectos mineiros, estamos de acordo en valorar unha vez máis que as autoridades obvian sistematicamente cuestións sociais, ambientais e culturais relevantes e que forman parte fundamental da vida das comunidades rurais, outorgando unha protección desmesurada ás empresas e deixando a cidadanía exposta a todo tipo de atropelos e abusos”.

Pola súa parte, a propia sentenza remarca como a empresa mineira Cosmos apela ás institucións e as leis para o que lle convén, e descualifícaas ou minimízaas no momento en que lle impiden ou significan o control da súa actividade. Neste sentido, unha das cuestións máis salientables recollidas na sentenza é que, máis aló da actitude da empresa, que defende os seus intereses comerciais, as principais irregularidades son cometidas polas institucións públicas autonómicas, ao non cumprir coas exixencias que deben facerse a este tipo de proxectos.

Basicamente, non consideran a clasificación real do solo onde está situada a mina, e os informes que achegaron ao proceso non eran os que se lles requirían. Pola contra, queda de manifesto que tenden a súa alfombra vermella á empresa para que poida continuar ao seu antollo coa actividade extractiva, tal como viña facendo en décadas pasadas, sen exixirlle o cumprimento estrito da lei nin o respecto ao medio ambiente e as persoas.

Desde ContraMINAcción celebramos esta sentenza, que supón un éxito na nosa loita pola defensa do territorio, e unha recarga de forzas para continuar nela.

Save

A Rede ContraMINAcción respalda a campaña Vida e Ría

Nunha reunión celebrada o domingo 21 de maio na sede do Sindicato Labrego Galego en Santiago de Compostela, os colectivos de ContraMINAcción, Rede contra a minaría destrutiva na Galiza deron o seu respaldo á campaña Vida e Ría ou Minaría?

Estabeleceron estratexias concretas para axudar a difundir e internacionalizar a cuestión, particularmente coa rede Yes to Life, No to Mining, da que forman parte e que xa realizou unha visita de verificación ás Minas de San Finx o pasado mes de marzo.

Os colectivos integrantes de ContraMINAcción, varios deles xa personados directamente en diversos procedementos relacionados coas Minas de San Finx, comprometéronse a traballar ombreiro con ombreiro xunto coas entidades locais e comarcais da Ría, e a facilitar apoios adicionais, particularmente a nivel técnico (cun equipo de enxeñeiros de minas especializado en impactos ambientais), legal (colocando a disposición da campaña os advogados de varios dos colectivos) e de financiamento (de modo a poder soster as accións da campaña no tempo).