Arquivo da categoría: ContraMINAcción

Información sobre e desde a rede ContraMINAcción.

A vintena de colectivos de contraMINAcción solidarízase con Marcos Celeiro e reafírmanse na loita contra a minaría salvaxe na Galiza

Se algo quedou claro no II Encontro sobre os Impactos da Minaría en Galiza é que todo o noso territorio está ameazado pola proliferación de proxectos mineiros en fase de permiso solicitado, concedido, de exploración, etcétera, que se suman ás explotacións de mineral xa en activo. E para iso, moitas empresas mineiras non só realizan a súa actividade saltándose a legalidade vixente e destruíndo espazos como solos rústicos de protección agropecuaria, reservas da biosfera ou Rede Natura; senón que, no caso concreto de Cementos Cosmos, tamén pasaron á represión dos e das activistas que denuncian estas ilegalidades. Ese foi o caso do noso compañeiro Marcos Celeiro, presidente da Asociación Cultural O Iribio, de Triacastela, que denunciou esta empresa por estar a desenvolver a súa actividade sen os permisos e licenzas pertinentes e se atopou cunha demanda da cementeira de 45.000 euros máis as costas xudiciais do proceso.

Momento da intervención de Marcos Celeiro

Momento da intervención de Marcos Celeiro

Dende o II Encontro sobre os Impactos da Minaría en Galiza, tódalas organizacións e colectivos que formamos parte da Plataforma contraMINAcción solidarizámonos con Marcos e o resto de activistas do Iribio que están ameazados e ameazadas. Diante da actitude de Cementos Cosmos, dende contraMINAcción queremos lanzar unha mensaxe clara e inequívoca á patronal mineira: nin esta nin ningunha outra tentativa de amordazarnos van impedir que sigamos denunciando as ilegalidades que cometen nin o feito de que, coa complicidade do Goberno da Xunta, pretendan apropiarse do noso territorio para o seu lucro privado e a costa de destruír e envelenar o noso medio natural e atentar contra sectores produtivos vitais para a nosa economía como a agricultura, a gandería ou a pesca.
Marcos Celeiro, compañeiros do Iribio: non estades sós

Marcos Celeiro, compañeiros do Iribio: non estades sós

Precisamente, este último feito foi un denominador común das diversas análises que se fixeron no Encontro sobre proxectos mineiros como os que Erimsa pretende levar a cabo na Terra Chá ou Edgewater en Bergantiños, ou explotacións en marcha como a de Cementos Cosmos en Triacastela. Estes exemplos deixan ben claro que a destrución irreparable do noso patrimonio e dos postos de traballo que provoca a minaría salvaxe sáelle infinitamente máis cara á sociedade galega que os lucros particulares que obteñen desa explotación os accionistas dunhas empresas que, na maior parte, adoitan ser estranxeiras. E falamos da Terra Chá, de Bergantiños e Triacastela, pero tamén poderiamos engadir á lista importantes bisbarras dende o punto de vista medioambiental ou agrario como A Fonsagrada, O Courel, Barbanza, a Serra do Galiñeiro, Ordes, A Limia, etcétera.

Polo demais, o II Encontro sobre os Impactos da Minaría, amais de analizar os principais conflitos abertos na Galiza, tivo unha parte didáctica na que as persoas asistentes se formaron en lexislación urbanística e medioambiental de cara a ter ferramentas para investigar os atentados da minaría salvaxe contra os nosos bens comúns e acadar, a maiores, a capacidade para levar adiante procesos de denuncia contra as empresas infractoras.

Estamos todos e todas no mesmo barco e de todos e todas é a terra que está ameazada.

Presentación do II Encontro Galego sobre os impactos da Minaría

O II Encontro Galego sobre os Impactos da Minaría afondará en conflitos abertos como o de Erimsa na Terra Chá ou o de Cementos Cosmos en Triacastela

A plataforma ContraMINAcción presentou hoxe, 5 de novembro, en Lugo, o II Encontro Galego sobre os Impactos da Minaría, que se celebrarán nesta mesma cidade o sábado, 8 de novembro. Desta maneira, ContraMINAcción dá continuidade ao primeiro encontro destas características, que se celebrou en Compostela en febreiro de 2013.
As persoas encargadas de presentar os encontros -Xoán Doldán, Marcos Celeiro e Margarida Prieto- coincidiron en sinalar a pertinencia deste evento, habida conta de que hai varios conflitos abertos na Galiza por minas en activo, e unha grande cantidade en forma de proxectos que ameazan o noso territorio e algunha das súas principais actividades económicas, como a agricultura e a gandería. Dende este punto de vista, Marcos Celeiro sinalou que “estes conflitos teñen moito que ver coa actitude da Administración Galega que, nos últimos anos ten facilitado a explotación mineira con mudanzas lexislativas”. Neste senso, cómpre destacar o borrador da Lei do Solo ou Plan de Actividades Extractivas.

Representantes de ContraMINAcción presentaron o evento

Representantes de ContraMINAcción presentaron o evento

A elección de Lugo para celebrar este encontro non é casual, xa que esta provincia ten sido escenario de importantes protestas sociais contra a actividade de empresas mineiras, e vaino seguir sendo por mor dos moitos proxectos extractivos que se queren levar a cabo no futuro. Por iso, no programa do encontro estará centrado en conflitos como o da extracción de cuarzo na Terra Chá pola empresa Erimsa, a actividade de Cementos Cosmos na canteira de Vilavella (Triacastela), ou a minaría aurífera que, aínda tendo as miradas postas en Corcoesto (A Coruña), ten tamén varios proxectos en terras lucenses.
Para abordar toda esta complexa e variada problemática, ContraMINAcción estruturou o Encontro en catro grandes bloques que comezarán con palestras de expertos e expertas e persoas e colectivos afectados pola minaría, e continuarán con diálogos e debates coas persoas asistentes:
10:00 a 11:30 / Minaría e patrimonio. A problemática da mina a ceo aberto de Cementos Cosmos.
• Marcos Celeiro, Asociación O Iribio (Triacastela) e
• André Pena Graña, doutor en Arqueoloxía e Historia Antiga pola USC.

 
12:00 a 13:30 / O conflito de Corcoesto e a minaría aurífera en Galiza.
• Paco García, Plataforma pola Defensa de Corcoesto e Bergantiños.
• Guadalupe Rodríguez, Salva a Selva.

16:00 a 17:30 / Minaría e agricultura na Terra Chá.
• Rosa Morán, veciña afectada de Muimenta.
• Margarida Prieto Ledo, coordinadora da loita contra as minas no Sindicato Labrego Galego.
• Juan Ramón Vidal Romaní, director do Instituto de Xeoloxía Isidro Parga Pondal.
• Isabel Vilalba Seivane, secretaria xeral do Sindicato Labrego Galego.

 
18:00 a 19:30 / Lexislación mineira e alternativas
• Benedito Álvarez García, profesor de Ensino Secundario e experto en lexislación urbanística.
• Xoán Doldán, profesor de Economía Aplicada e presidente de Véspera de Nada.
O II Encontro Galego sobre os Impactos da Minaría terán lugar no local do Centro Social Madialeva, na rúa Ancares 18 (Lugo).
Dende ContraMINAcción agardamos contar coa vosa presenza para darlle a máxima difusión posible a este Encontro nos medios de comunicación cos que traballades.

Estamos todos e todas no mesmo barco e de todas e todos é a terra que está ameazada.

Os II Encontros sobre os impactos da minaría celebraranse en Lugo

 

O sábado, día 8 de novembro, celebraranse en Lugo os II Encontros sobre os impactos da minaría, organizados por ContraMINAcción

O lugar de celebración será o Centro Social Madialeva,  sito na rúa de Ancares, número 18.

Cartaz das xornadas, co programa completo

                       Cartaz das xornadas, co programa completo

Nos Encontros, que terán lugar en xornada de mañá e tarde, contaremos coa presenza de un fato de poñentes, que falarán sobre diversos temas relacionadas coa minaría: impactos na agricultura e no patrimonio, megaminaría e saúde, consecuencias da actual lexislación mineira, e posibles alternativas.

Cara o mediodía haberá unha pausa para comer no propio Centro Social. As persoas interesadas en asistir a estes Encontros deberán anotarse nesta ligazón. Se ademais queredes comer connosco, deberedes especificalo na mesma.

 

 

 

Campaña europea para prohibir o uso do cianuro na minaría

Diante da inminente celebración de audiencias para ratificar no seu cargo ao Comisario de medio ambiente da Unión Europea, desde distintas organizacións europeas en contra de proxectos mineiros, decidimos iniciar unha campaña para promover a prohibición do uso do cianuro na minería, divulgando entre os eurodiputados, e moi especialmente aqueles que están na Comisión de medio ambiente, os riscos derivados do uso desta perigosísima substancia.

bancyanide2

Así, vimos de elaborar unha lista de preguntas que queremos, a través das e os parlamentari@s que están nesa Comisión, trasladarlle ao Comisario de ENVI.

Esperamos que coa vosa axuda o candidato a Comisario de ENVI reciba a nosa mensaxe: ¡Non ao ouro tóxico! durante as audiencias que terán lugar no Parlamento Europeo nos próximos días. 

Como podemos facelo? É doado colaborar desde a túa casa, simplemente utilizando as redes sociais e o correo electrónico.

  • Nesta páxina podes ver os contactos d@s eurodiputad@s de España da Comisión de Medio Ambiente. Só tes que escoller, na pestana “País”, España; na de “Órganos políticos”, Comisións; e á dereita, a Comisión de Medio ambiente, Saúde Pública e Seguridade alimentaria.  Pódense enviar chamamentos a diputad@s de calquera Comisión, pero pensamos que se debe priorizar a Comisión de Medio ambiente.

  • Ao pinchar en cada nome, ábrese o perfil, no que á dereita aparece o correo electrónico, así como o teléfono. Envíalle un correo electrónico ou chama, pedíndolle que, nas audiencias que se van celebrar, presione contra o cianuro. Podes enviarlle algunha das preguntas que elaboramos, ben sexa en galego ou en castelán.

  • Segue o seu perfil en Facebook o Twitter e envíalle unha ou dúas mensaxes ou tweets. Suxírelle unha das preguntas para a audiencia.

  • Propostas de tweets a enviar:

    Axuda! Temos preguntas para audiencia Comisario ENVI 29 sept #bancyanide #nonaoourotoxico

    Comunidades en toda a Unión Europea confrontadas con proxectos mineiros que implican o uso de cianuro #bancyanide #nonaoourotoxico

    @(nome eurodiputad@) Campaña internacional contra o uso de cianuro na minería, preguntas para Comisario ENVI aquí #bancyanide #nonaoourotoxico

    @(nome eurodiputad@) encontras as nosas preguntas para o Comisario ENVI aquí sobre #bancyanide #nonaoourotoxico

    #Cianuro dana saúde e ecosistemas. Preguntas #bancyanide para ComisarioENVI aquí

    Podes formular unha destas preguntas ao comisario ENVI? Grazas de @mineriagalicia #bancyanide #nonaoourotoxico

Se utilizas os tweets en español, para divulgar en todo o estado, substitúe a ligazón pola das preguntas en español.

Anímate e colabora connosco!

NON MÁIS OURO TÓXICO!!

Para máis información sobre a campaña: Guía (galego); Guía (castelán)

Asemblea de ContraMINAcción en Ramil

asemblea_abril_14

Reunión de ContraMINAcción. Máis imaxes

O pasado sábado tivo lugar en Ramil (Agolada) un novo encontro dos colectivos da Rede ContraMINAcción, co fin de analizar o estado actual dos diversos conflitos mineiros do noso país, e continuar coas propostas de intervención e denuncia diante dos mesmos.

Ao encontro acudiron representantes dos colectivos Asociación socio-cultural O Iribio, Cerne da Terra, Comisión das minas da Terra Cha, Contramínate, Petón do Lobo, Salva la Selva, Sindicato Labrego Galego, Véspera de nada e Verdegaia. Demos repaso a diversos conflitos mineiros ao longo do noso territorio, a situación na que se encontran neste momento, e as posibles liñas de traballo a seguir respecto aos mesmos.  Falamos da situación derivada da cancelación do proxecto de Corcoesto mentres a súa Declaración de Impacto Ambiental DIA segue, teoricamente, vixente; das repercusións que sobre un patrimonio cultural da envergadura da Cova de Eirós está tendo a explotación de Cementos Cosmos, en Triacastela; da caducidade nas concesións da Terra Cha; das  louseiras do Courel, agora subterráneas; dos permisos mineiros solicitados na Fonsagrada; da posibilidade de que o Plan Sectorial de Actividades Extractivas poida supoñer a reapertura do proxecto da Limia; e da ameaza que supón o proxecto de explotación de Presqueiras,en Forcarei, proxecto que pretenden converter no maior de Europa de tántalo e estaño

A Lei do Solo, o Plan Sectorial de Actividades Extractivas ou o Plan Director  de Rede Natura, recentemente feito público, e que abre as portas a todo  tipo de explotacións mineiras, mesmo nos lugares onde se encontran hábitats e especies que deberían ter a máxima protección, están a ter unha incidencia moi negativa na protección dos usos tradicionais do solo, como a agricultura e a gandeiría, e na protección do ambiente.

A maioría dos colectivos expresaron as súas queixas polas irregularidades na tramitación dos proxectos mineiros, tanto no referente ao cumprimento dos prazos, como, sobre todo, ás dificultades encontradas á hora de acceder a información pública. A estas irregularidades súmanse as diversas estratexias de intimidación que as empresas mineiras e funcionarios públicos utilizan sobre as persoas e colectivos activos contra os proxectos.

Na Asemblea acordouse denunciar públicamente estas trabas, así como pedir aos representantes dos distintos grupos políticos que as leven ante o Parlamento galego.

ContraMINAcción perfilou tamén as liñas xerais do II Encontro galego sobre os impactos da minaría que terá lugar cara o último trimestre de 2014. Centrarase nos impactos sobre a auga e a saúde, os cambios lexislativos e o Patrimonio cultural.

Neste sentido, desde a Rede queremos facer pública a nosa defensa a ultranza de que un patrimonio arqueolóxico como a Cova de Eirós, que o propio Conselleiro de Educación cualificou como “o maior achado arqueolóxico do noroeste peninsular”, sexa considerado xa BIC, e se tomen as medidas necesarias para evitar un maior deterioro desa importante xoia da nosa historia. 

O encontro rematou cun xantar festivo ao aire libre, no que as persoas representantes dos colectivos participantes aproveitamos para estreitar lazos nun ambiente distendido e cordial.  

ContraMINAcción responde ao Colexio Oficial de Xeólogos

ContraMINAcción rexeita a tosca manipulación á que se presta o Colexio Oficial de Xeólogos a través do seu presidente, Luis Suárez Ordóñez, apoiando o proxecto mineiro de Corcoesto. O contido da declaración non deixa lugar a dúbidas da súa postura totalmente en liña cos intereses empresariais dos promotores do proxecto, sen que sexa doado distinguir onde comeza a posición do Colexio e onde remata a da empresa. Talvez este sexa o motivo polo que se cae nos mesmos argumentos, tantas veces cuestionados por diferentes organizacións, incluída ContraMINAcción.

Unha primeira manipulación vémola no insistente e falso –en termos científicos– intento de ligar a actividade mineira co concepto de sustentabilidade. Falar de minaría sustentable ou de “explotación sustentable” dos recursos mineiros é un claro exemplo do que se define como oxímoro. Non se pode chegar a unha contradición maior que falar de sustentabilidade ao tempo que se explotan recursos non renovábeis e se pon en perigo a saúde e o ambiente. Nestas circunstancias, calquera iniciativa de que as xeracións futuras poidan gozar duns recursos nas mesmas condicións que a nosa é unha imposibilidade manifesta. Até certo punto podería ser obxecto de debate científico qué forma de explotación dos recursos non renovábeis resulta menos lesiva ou nociva ambientalmente, mais que exista unha actividade con posibilidades de permanencia no tempo que garanta aos nosos fillos e fillas, netos ou netas, poder seguir manténdoa cara o futuro só está garantido nos recursos renovábeis –na produción de alimentos, de recursos forestais, pesqueiros, etc.– e sempre que estes sexan utilizados evitando a súa degradación ou a destrución da capacidade de rexeneración. Por tanto, e por definición, o uso dos recursos mineiros é un uso insustentábel, independetemente do tipo de minaría que se practique. Isto percíbese facilmente cando atendemos, por exemplo, aos datos sobre como está a evolucionar o esforzo mineiro a realizar, as toneladas de terra a remover, a lei do mineral que se obtén, etc.

Top-6-Silver-Companies-Production-Processed-Ore-2005-2012B

Produción media por tonelada de mineral das 6 principais minas de prata nos últimos sete anos. Cada vez é necesario manipular máis mineral e entullos para obter a mesma cantidade de metais 

Resulta especialmente molesta a referencia pouco sutil á suposta ignorancia das persoas que se opoñen abertamente ao proxecto mineiro de Corcoesto. Máis molesto se cabe se estas palabras son emitidas por quen representa a un “Ilustre Colexio Oficial” de profesionais titulados na universidade, atribuíndose unha sorte de exclusividade no acceso á información e unha capacidade de raciocinio propio dunha sociedade estamental ou de castas. Mais a ciencia tamén ten demostrado que calquera ser humano, polo feito de selo, está dotado desa capacidade e que cando se nos di que “o descoñecemento de parte da cidadanía sobre a orixe destas materias primas, provoca movementos de oposición baseados na desconfianza, pero que carecen de fundamento científico”, sabemos que estamos diante dunha afirmación que constitúe unha falacia denominada argumento ad hominem, é dicir, unha argumentación que pretende establecer a falsidade dos postulados dos que se opoñen ao proxecto mineiro atribuíndolles un descoñecemento científico suposto sen que se entre a razoar onde residen os erros dos argumentos antimineiros ou, con demostracións científicas verificables, onde se acha a suposta ausencia de fundamento científico. Ao tempo esta falacia sopórtase noutra do tipo argumentum ad verecundiam, é dicir dar por suposto que tais coñecementos científicos e, polo tanto, a razón están do lado do Colexio Oficial de Xeólogos porque teñen a autoridade na materia. Sobra dicir que tais argumentos falaces van en contra de calquera razoamento científico serio. Por iso afirmamos que o que nos sobra é ese coñecemento científico que se nos quere negar, e dese coñecemento científico vén a certeza das razóns para a desconfianza. Por se non for suficiente existen evidencias do modo de traballar das transnacionais mineiras denunciadas en todo o mundo e mesmo polas Nacións Unidas para saber que o que menos se pode facer é confiar nelas, nin deixarse levar polos seus cantos de serea. Sabemos de onde veñen esas materias primas, quen as manexa e a onde van. Tamén sabemos que sempre hai mercenarios –mesmo con titulacións universitarias– dispostos a poñerse diante das batallas promovidas por outros e que, calquera que sexan as armas ou estandartes que enarboren, iso non lles outorga a razón. Por moi colexiados universitarios que sexan por moito que metan a palabra ciencia no medio dos seus argumentos, por moito que insinúen a ignorancia dos demais, a razón, os criterios de verdade ou erro, non se teñen por quen argumenta senón polo contido do argumentado. E nese debate aberto e público estámolos agardando desde hai tempo, cando queiran.

Nas declaracións do sr. Luís Suárez, tamén se afirma que”existen solucións científicas, tecnicamente viables, a todos os problemas que se propoñen na explotación”. É curiosa a forma en como se expresa ou redacta, acaso propóñense problemas na explotación?, mais ben a empresa négaos insistentemente e os demais denunciámolos. Esas “solucións científicas, tecnicamente viables” –a cales se refiren? ás cacarexadas pola empresa?– son, como moito, paliativos, é dicir, mitigan o dano mais non o evitan nin reverten o problema. As solucións para selo, deben remediar os problemas, é dicir, evitalos, previlos ou facelos desaparecer. Até agora nada do presentado evita, prevén ou fai desaparecer os problemas coñecidos e os non recoñecidos.

É magoa que o representante do Colexio Oficial de Xeólogos non coñeza o fenómeno dos pobos mineiros fantasma que se estenden por todo o planeta, e mesmo non distingan os efectos segundo o tipo de minaría, o tempo de explotación do xacemento, os efectos negativos sobre as estruturas sociais e económicas de tantos lugares. Doutro xeito, de coñecelos, con certeza non afirmaría tan alegremente que “as minas son motores económicos das súas comarcas e unha vez restauradas convenientemente poden e deben achegar oportunidades de actividade económica alternativa”. A que alternativas se refire? Enuméreas, por favor. Acaso será o turismo de catástrofes? Aulas ambientais para ver o que non debeu ser? Parque de atraccións de risco (de saúde)? Laboratorio de economía insustentábel?. Se como afirma “os exemplos destes feitos son numerosos”. Díganos onde? cantos? Cales deles serían trasladábeis, como e por que ao caso de Corcoesto?. Desexamos sabelo e velos. E non será, señor Suárez, que hai máis numerosos exemplos do contrario?.

Para rematar, ContraMINAcción congratúlase da afirmación final de que “o noso benestar tamén sae da terra”. Aí falaron, non poderíamos estar máis de acordo. Estamos de acordo na súa literalidade mais non o que pretenden dicir con ela. O noso benestar sae da terra mais non vén da minaría senón dos alimentos que a terra nos fornece, da auga e os ciclos de autodepuración natural, do ar limpo, dos bosques e ecosistemas que manteñen a biodiversidade, etc. Ese é o benestar que queremos preservar, o que, cientificamente falando, pode ser definido como sustentable.

Ligazón

ContraMINAcción, premio Semente de Verdegaia

Verdegaia outorgoulle este ano o seu premio semente á mellor actuación ambiental do ano á rede ContraMINAcción polo seu labor reivindicativo contra a minaría contaminante en Galiza, e o premio cemento ao alcade de Cabana de Bergantiños -José Muíño Domínguez- en nome e representación da empresa e accionistas de Edgwater, empresa canadense promotora da mina a ceo aberto de Corcoesto.

Estes premios son propostos e elixidos anualmente entre as consideradas pola base asociativa de Verdegaia como peores actuacións ambientais do ano para o premio cemento, e as mellores actuacións para o premio semente. As propostas de este ano optaron claramente por defender a terra das agresións mineiras.

Seguir lendo…

Avaliación das xuntanzas mantidas entre ContraMINAcción, CxG e PSdG-PSOE

Na tarde do pasado venres, 22 de novembro, varias persoas da nosa rede levaron adiante a primeira rolda de contactos coas forzas políticas galegasno marco dunha estratexia de diálogo que pretende aclarar cal é o posicionamento de cada un destes partidos respecto do plan de explotación mineira da práctica totalidade do territorio galegoelucubrado por distintas empresas transnacionais de coñecida traxectoria destrutiva noutros países.

A primeira das xuntanzas tivo lugar coa formación Compromiso por Galicia (CxG),acudindo o seu secretario xeral, Xoan Bascuas, e Rocío López Pacio, integrante do Consello Político Nacional de CxG. Logo de revisar o documento proposto por ContraMINAcción, con trece puntos a asumir polas formacións políticas para facer fronte á destrución do territorio galego,CxG manifestou a súa total concordancia coas pautas presentadas e comprometeuse a elaborar un posicionamento público apoiando esta folla de ruta contra o plan de destrución medioambiental e do tecido produtivo galego que empresas como as canadenses Edgewater e Medgold Resources, a norueguesa Erimsa ou a anglosudafricana Picobello Andalucita, entre outras, pretenden aplicar sobre máis de 50.000 hectáreas do noso territorio.

Momento da xuntanza con CxG

Momento da xuntanza con CxG

Máis controvertida resultou posteriormente a reunión cos socialistas Carme Gallego e Abel Losada, vicevoceira da área de Medioambiente e voceiro de Industria do grupo parlamentar do PSdG, respectivamente.Ao igual que o Partido Popular na Xunta de Galiza, o Partido Socialista está a apoiar dende o Goberno do Principado de Asturias plans de extracción que optan polo emprego de substancias altamentecontaminantes nas súas prospeccións, coma é o caso da polémica compañía AsturGold, propiedade do consorcio de inversión ruso-canadense CP Capital.

Consecuentemente, ao respecto das medidas propostas por ContraMINAcción para Galiza, sinalaron con rotundidade o seu rexeitamento aos aspectos recollidos no punto 5, referido á oposición á entrada de novos proxectos de megaminería destrutiva no Paíse á necesidade develar polo cumprimento estrito da normativa medioambiental galega.

Así mesmo, opuxéronse a que sexan retiradas as subvencións públicas e/ou incentivos económicos concedidos aos proxectos mineiros recollido no punto 12 do citado documento-,cuxo indignante reparto está a ser novamente nestes días obxecto de argumentadas críticas a través dos medios de comunicación,denunciando, entre outros preocupantes aspectos, a concesión de ata 153.608,80 € de subvención directa para Cámara Oficial Mineira de Galicia (COMG), entidade que malia adicarse a “fomentar o desenvolvemento da minaría, así como representar, defender e promover os intereses dos socios, foi quen de obter a contía máis alta das outorgadas pola Xunta no surrealista epígrafeconcesión de subvencións a entidades sen ánimo de lucro para o fomento do sector mineiro galego(DOG Nº59 do 25 de marzo de 2013, páx.8861)

Durante a xuntanza co PSdeG-PSOE

Durante a xuntanza co PSdeG-PSOE

.

Porén, Carme Gallego e Abel Losada siadmitiron estar ao tanto dos intereses económicos que agochan este tipo de subvencións, e non se sorprenderon cando as/os representantes de ContraMINAcción argumentaron que a necesidade de prohibir este tipo de financiamento xorde da distorsión que actualmente están a ter os orzamentos públicos neste sentido, tendo sido outorgados inxentes cantidades de cartos baixo epígrafes ambiguos como o de “investigación universitaria” que, en realidade, son dirixidos a desenvolver a primeira parte dos plans extractivos destas empresas, é dicir, a análise prospectiva dos terreos.

Cómpre lembrar queesta primeira fase de exploración é coñecida no argot do negocio como de “risco mineiro”,debido ao tempo e diñeiro que as empresas teñen que gastar nesta etapa, fase que arestora está a ser financiada cos cartos da cidadanía galega, de tal xeito que estas empresas cuxa actividade leva canda si contaminar as nosas augas e destruír o noso territorio, están a empregar cartos públicos para botar a andar os seus proxectos, precisamente nun momento no que a cidadanía galega está asistindo a recortes económicos en servizos básicos como a educación e a sanidade públicas.

Opoñéndose a apoiar o punto número 12 das medidas propostas pola rede cidadá ContraMINAcción, o PSdG rexeita tamén que o criterio de sustentabilidade sexa fundamental á hora de apoiar a investigación de proxectos dirixidos á consecución de minerais. A fin de que esta formación política revise e actualice tanto este posicionamento coma o referido ao financiamento de estratexias de investigación, representantes de Contraminacción déronlle a coñecer datos referidos á obtención de minerais como o ouro a través do que se coñece coma minaría urbana, moi desenvolvida en países europeos nos últimos anos. Segundo os cálculos do Programa Medioambiental de Nacións Unidas (UNEP), 40 teléfonos móbiles conteñen aproximadamente a mesma cantidade de ouro que nunha tonelada de mineral sen peneirar. En resumo, atendendo aos últimos estudos realizados no Estado, nestes momentos habería máis ouro en SOGAMA que o que se podería chegar a extraer furando unha mina en Corcoesto.

Con respecto ao polémico Plan sectorial de Actividades Extractivas de Galicia(PSAEG) elaborado pola COMG, incoherente texto no que se afirma que O sector mineiro é pioneiro na protección do medio ambiente” pero que ao mesmo tempo establece explotacións mineiras en 3 dos 6 parques naturais galegos, o PSdG manifestou estar a favor de dito plan porque “mellor un plan sectorial a que un concelleiro decida el na cafetería que minas se aproban“,asumindo con preocupante naturalidade o grao de corrupción existente a día de hoxe no Estado Español.

Por último, cómpre salientar da información presentada nesta xuntanza a confirmación por parte dos representantes do PSdG de que son plenamente conscientes de que non se está a respectar a normativa europea de publicidade e información cidadá que esixe unha completa difusión pública deste tipo de proxectos polo menos durante seis meses.

Neste senso, é preciso lembrar queen reiteradas ocasións os colectivos integrantes de ContraMINAcción denunciaron a ocultación e vulneración dos dereitos da cidadanía en relación aos proxectos mineiros, ao detectarse a exposición pública parcial da documentación referida aos mesmos, o non recoñecemento da condición xurídica de “persoa interesada” nos expedientes a persoas e colectivos, a non publicación de información sensíbel nos boletíns oficiais ou taboleiros e un lamentábel etcétera, no que podemos destacar o feito de que proxectos de extracción mineira coma o de Corcoesto estiveron a exposición pública unicamente durante trinta días.

No marco desta rolda de consultas sobre o posicionamento dos partidos políticos galegos respecto das megaexplotacións de transnacionais mineiras na Galiza, unha segunda xeira de reunións terá lugar no Local Nacional do Sindicato Labrego Galego (SLG) en Compostela o vindeiro venres 29 de novembro, con representantes da coalición Alternativa Galega de Esquerda (AGE) ás 16.00hrs., e do Bloque Nacionalista Galego (BNG) ás 18.00hrs.

Nas últimas horas vén de confirmar tamén a súa participación nesta rolda de consultas o Partido Popular (PPdG), á espera nestes momentos de concretar data e hora dunha posíbel xuntanza.

Pincha para ver o documento presentado aos partidos por ContraMINAcción

Charla en Forcarei sobre os impactos dos proxectos mineiros coa participación de dous membros de ContraMINAcción

Un momento da intervención de Marga Prieto

Un momento da intervención de Marga Prieto

No acto alertouse sobre os impactos negativos dos proxectos mineiros nas comarcas do Deza, Tabeirós-Terra de Montes e O Carballiño

A charla, titulada “A mina de Presqueiras, Xirarga e Rubillón: Prexuízo ou beneficio?”, tivo lugar na casa do pobo de Guisande, en San Miguel de Presqueiras,

Este acto informativo correu a cargo de Margarida Prieto Ledo, coordinadora da loita contra as minas no Sindicato Labrego Galego, e representante do mesmo en ContraMINAcción; Xoán Doldán, profesor da Universidade de Santiago de Compostela, presidente da Asociación de Economía Ecolóxica en España (EcoEcoEs), e representante de Véspera de Nada na nosa Rede; Roberto Jorge Correa, presidente da Comunidade de Montes de San Miguel de Presqueiras; e Víctor Manuel Gil Ramos, secretario da Comunidade de Montes de Xirarga.

Marga Prieto centrouse nos impactos da megaminaría nas actividades agrogandeiras e forestais; e Xoán Doldán, nas características depredadoras da megaminaría e do carácter especulativo das empresas multinacionais que a impulsan. Roberto Jorge Correa, pola súa parte, falou dos proxectos que teñen para a parroquia, das xuntanzas que tiveron coa empresa Solid Mines e dalgúns detalles do anteproxecto que esta lles acaba de presentar. Víctor Manuel Gil expuxo a preocupación que existe na veciñanza cos previsibles impactos da mina en proxecto e a desconfianza respecto do pouco que reverterá na economía da zona.

Despois destas intervencións, houbo un coloquio de máis de unha hora, onde veciños e veciñas deron conta das súas moitas inquedanzas. Un dos temores máis grandes da veciñanza afectada ten que ver co impacto que tería a actividade mineira sobre os recursos hídricos da zona, xa que as minas precisan utilizar cantidades inxentes de auga. Ademais, o impacto que tería a utilización de maquinaria pesada e a utilización de explosivos contribuiría a aumentar os efectos negativos da explotación mineira. Preocupa tamén a incerteza das compensacións, así como a necesidade de que exista unha comisión de seguimento integrada polo conxunto de persoas afectadas, que estea vixiante e trate coa empresa todas as posibles actuacións con capacidade de veto sobre as mesmas.

Na actualidade están solicitados permisos de investigación para 5 proxectos mineiros nesta zona que afectarían a un total de 11.590 hectáreas. O maior destes proxectos é o Vilatuxe 3.129, solicitado en 2011 e pendente de resolución, que afecta a 7.650 hectáreas dos concellos de Forcarei, Silleda e Lalín. Ademais, tamén afectan a Forcarei, Cerdedo, Beariz, A Lama e Avión os proxectos Alberta 1 e 2, que abranguen en conxunto 6.491 hectáreas.

Coma sempre, as empresas interesadas en explotar estes xacementos son estranxeiras. No caso do proxecto Alberta, trátase de Solid Mines, filial española da compañía canadense de con sede en Vancouver, Solid Resources LTD, que quere explotar minerais como tantalio, estaño ou litio nunha área de 11 quilómetros entre os núcleos de Presqueiras, Correa, Doade, Coto-Tocaio, Acebedo, Rubillón e Taboazas (Forcarei, Beariz e Avión), nunha zona que se inclúe na Rede Natura 2000.

ContraMINAcción, satisfeita pola posible anulación do proxecto mineiro de Corcoesto

solidariedade

 

A rede de colectivos ContraMINAcción manifesta a súa satisfacción polas recentes declaracións do presidente da Xunta de Galicia, Alberto Núñez Feijoo, ao respecto da anulación do proxecto mineiro de Corcoesto.

Desde a rede ContraMINAcción agardamos, cunha certa desconfianza, que esas declaracións do presidente se traduzan o antes posible nunha anulación oficial de todo o proxecto pola mesma vía pola que este foi presentado a exposición pública: o DOG”, declara Nela Abella, do colectivo Verdegaia e da Plataforma pola Defensa de Corcoesto e Bergantiños. A rede agarda pois a resolución pública no DOG antes de celebrar como unha vitoria definitiva a que de momento só e unha “suposta” anulación.

A posición de ContraMINAcción, rede de colectivos en contra da minaría fronte ao proxecto mineiro e clara: que sexan anulados inmediatamente tódolos documentos presentados por Edgewater; é dicir: o plano de restauración, o estudo de impacto ambiental (EIA), así como a declaración de impacto ambiental (DIA) favorable da Consellería de Medio Ambiente; e tamén os dereitos mineiros da empresa sobre as concesións relacionadas con ese proxecto. Así mesmo, ao incumprir o proxecto mineiro de Corcoesto a Lei da Política industrial de Galiza, debe ser rexeitada de xeito oficial a solicitude de ser considerado como estratéxico.

En tanto non se anule a DIA, autorización xa concedida, e se deneguen todos os demais trámites de forma oficial, nós continuaremos con tódalas nosas accións sen dar credibilidade a estas declaracións, que por agora só son palabras que leva o vento”, manifesta Marcos Celeiro, da Associaçao Socio-Cultural O Iribio.

ContraMINAcción lamenta que a —de momento suposta— anulación se basee unicamente en criterios financeiros, e deixe de lado todos os impactos ambientais, que denuncian hai tempo tanto colectivos opostos ás minas como o ámbito científico, e dos que dan boa conta os distintos informes elaborados ao respecto.

Houbo demasiadas irregularidades ata o momento, na tramitación deste proxecto, que foron denunciadas desde o primeiro momento polos colectivos implicados na loita contra o mesmo”, declara Aurora Puentes de Santa Comba Viva.

Nesta liña, é inexplicable a demora en satisfacer o dereito ao acceso á información de carácter ambiental por parte da Xunta, xa que repetidos intentos de acceder a informacións recentes sobre o proxecto foron frustrados”, declara Margarida Prieto do Sindicato Labrego Galego.

Eu non baixaría a garda, pois o anuncio de suspensión do proxecto ten toda a pinta de tratarse dunha nova estratexia de despiste por parte da Xunta, ben para tentar acalmar unha vez máis a oposición aos proxectos mineiros ou ben para mellorar as condicións en que pactaron o proxecto, todo en medio dunha falta total de competencia técnica e escurantismo cara á comunidade”, di Guadalupe Rodríguez do colectivo internacional Salva la Selva.

ContraMINAcción seguirá a traballar en defensa do territorio e denunciando en tódalas instancias ao alcance calquera irregularidade de tramitación relacionada con este proxecto e con calquera outro proxecto mineiro que se pretenda sacar adiante, así como contra os graves impactos ambientais derivados das actividades extractivas. Esta rede de colectivos continuará mobilizada permanentemente en loita contra todos os proxectos mineiros actuais e futuros que pretendan destruír o noso país, independentemente do que finalmente aconteza co proxecto mineiro de Corcoesto, pois esta só é unha das moitas ameazas que temos sobre a nosa terra, as nosas vidas e o noso futuro.

Dende ContraMINAcción agardamos que esta información sexa do voso interese, e pedímosvos que lle deades a máxima difusión posible.

Estamos todas e todos no mesmo barco e de todos e todas é a terra que está ameazada.

Moitas grazas.