Arquivos da etiqueta: Triacastela

Ligazón

 Novos reveses para Cementos Cosmos en Triacastela

6587-tmp.redimensionado

A Asociación Socio-Cultural O Iribio denunciou recentemene ante o SEPRONA as actividades e obras ilegais na explotación a ceo aberto de Cementos Cosmos en Triacastela que invaden a zona de policía de 100 metros de dous cauces fluviais do dominio público hidráulico. Tamén se denunciaron vertidos ilegais nos cauces, incumplimentos das condicións das concesións de aproveitamento de augas e vertidos outorgadas «ás escondidas» pola Confederación Hidrográfica Miño-Sil anos atrás e que só recentemente os veciños descubriron a sua existencia.

Seguir lendo

Xuízo a Marcos de Eirós (versos de Manolo Pipas)

Aquí vos deixamos os versos que o compañeiro Manolo Pipas lle adica no seu blog a Marcos. Grazas, Manolo!

asaida

cos corpos e coa palabra

defender a nosa terra

non debe ser un delito

para nós é unha promesa

.

xulgado por protestar

de vigo a triacastela

todos con marcos celeiro

defendendo cova e terra

liberdade de expresión

contra unha cementeira

 

manolo pipas

Esperando pola absolución de Marcos Celeiro

Os colectivos de ContraMINAcción agardamos a absolución de Marcos Celeiro trala denuncia intimidatoria e infundada de Cementos Cosmos

Un momento da concentración en apoio a Marcos

Un momento da concentración en apoio a Marcos

Esta mañá tivo lugar en Vigo a vista oral do proceso que se segue contra o activista Marcos Celeiro, da asociación O Iribio, por suposto delito de danos contra o honor da empresa Cementos Cosmos, que desenvolve a súa actividade en Triacastela, enriba dunha das xoias da arte rupestre, a Cova de Eirós.

Á súa saída do xulgado, Marcos atopouse cun numeroso grupo de veciños de Triacastela, que se desprazaron ata Vigo para arroupalo durante o proceso. Estaban presentes na porta do xulgado tamén un considerable número de activistas de distintas organizacións medioambientais, nomeadamente de ContraMINAcción, rede contra a minaría destrutiva na Galiza, da que O Iribio fai parte. Ás persoas que se congregaron diante dos xulgados, habería que engadir o apoio expreso a Marcos Celeiro que deron medio cento de organizacións sociais de Galiza e do resto do mundo, que asinaron durante esta semana un manifesto de solidariedade que se pode ler na anterior entrada do noso blog.

Marcos, á saída do xuízo

Marcos, á saída do xuízo

As persoas alí presentes portaban diversas pancartas con lemas alusivos á defensa das liberdades, así como ao dereito a defender a nosa terra.

Na vista pública, ademais de Marcos, declararon un representante da empresa e dous peritos en cuestións relacionadas coas redes sociais. As conclusións de ambas partes (acusación e defensa), que non chegaron a lerse por falta de tempo, serán analizadas pola xuíza nun prazo de menos dunha semana, antes de que quede visto para sentencia.

O que está en xogo neste xuízo non é só se Marcos é ou non inocente (algo sobre o que desde ContraMINAcción non temos dúbida ningunha), nin se a empresa -que, non o esquezamos, acumula un gran número de denuncias nos xulgados por diversas irregularidades- ten ou non dereito a unha indemnización.

O que está en xogo é algo que vai moito máis aló: a nosa posibilidade de continuar loitando libremente para defender o noso medio ambiente e a nosa terra. E o noso dereito á liberdade de expresión.

Que vai ser das organizacións sociais se se ameazan as nosas liberdades?

Desde ContraMINAcción pensamos que esta demanda é un castigo da multinacional contra unha das cabezas visibles da loita contra as irregularidades detectadas na súa actividade. Deste xeito preténdese, á vez que manter un activista (e mesmo a todo un colectivo) apartado da súa loita, ocupado en responder a esa demanda, desactivado, en fin; amedrentar tamén a tódalas persoas, a tódolos colectivos, que se atreven a levantar a súa voz contra a inxustiza, as irregularidades empresariais e os abusos.

Equivócase Cementos Cosmos se agarda que abandonemos a nosa loita e deixemos a nosa labor de denuncia. Moi ao contrario, o ataque a Marcos só serve para mobilizarnos aínda máis e unirnos.

Nin nos van calar, nin nos van parar.

Nós tamén somos Marcos. Nin nos van calar, nin nos van parar.

¿Silenciando nos xulgados os defensores da terra?

O vindeiro 7 de maio terá lugar no xulgado número 13 de Vigo a vista oral da demanda iniciada por Cementos Cosmos contra o veciño de Triacastela Marcos Celeiro, por suposto atentado contra o honor da empresa. Marcos Celeiro oponse xunto á veciñanza de Triacastela á mina a ceo aberto de Cementos Cosmos.

O xoves que vén non se xulga a Marcos Celeiro. Xúlgase, sobre todo, o dereito das persoas e das comunidades a se mobilizaren para defender o que é seu: a súa terra, o seu patrimonio natural, o seu futuro. Xúlgase o noso dereito, o de toda a cidadanía, a denunciar en voz alta e publicamente as irregularidades que as empresas cometen no seu afán desmedido de explotación dos recursos e das persoas. Xúlganse, en fin, as máis básicas liberdades democráticas, esas que a nosa administración ten a obriga de garantir. E non de perseguir. Porque o exercicio da liberdade de expresión é un dereito, non un delito.

Nin nos van calar, nin nos van parar

Nin nos van calar, nin nos van parar

Os motivos que Cementos Cosmos, pertencente á multinacional Votorantim, esgrime para a demanda, son o de ter denunciado Marcos nas redes sociais (Facebook, Twitter, Youtube) as irregularidades cometidas pola empresa. Esas irregularidades veñen sendo recollidas ao longo do tempo por distintos medios de comunicación. Nalgúns casos, a denuncia da irregularidade ía acompañada de vídeos nos que se podía comprobar a veracidade dos feitos denunciados.

Desde ContraMINAcción pensamos que o obxectivo desta demanda de Cosmos contra o noso compañeiro Marcos non é outro que amedrentar ás persoas que se opoñen á súa actividade, ao tempo que criminalizar a loita dos colectivos que denunciamos as súas irregularidades.

Cementos Cosmos ten un longo historial de denuncias desde distintos colectivos, polas súas malas prácticas na explotación. Entre outras cousas, está a poñer en risco o noso patrimonio arqueolóxico coa súa actividade, diante da pasividade da nosa administración. Somos moitos os colectivos que denunciamos a afección que, a causa da actividade da empresa, está a sufrir unha das maiores xoias do noso patrimonio cultural, a Cova de Eirós. Mentres as nosas denuncias caen en saco roto, a demanda inxustificada da empresa contra o noso compañeiro continúa o seu curso.

ContraMINAcción denuncia que desde a empresa e con esta demanda, quere reducirse a loita de distintos colectivos a unha cuestión persoal e anecdótica, a un suposto capricho de Marcos Celeiro en contra da empresa. Así, ao tempo que se criminaliza a nosa loita cidadá e se trata de paralizar a mesma mediante a busca dun castigo exemplarizante e a todas luces inxustificado contra unha das cabezas visibles da mesma, preténdese minimizar a oposición veciñal, tratando de facer ver á opinión pública que só se trata dunha arroutada persoal aquilo que é en realidade unha loita colectiva dunha comunidade polo seu territorio.

En lugar de levar a un xuízo longo e desgastante a un cidadán de a pe como Marcos Celeiro, Cementos Cosmos debería presentar publicamente toda a documentación que aínda non facilitou, comprobar que ten ao día todos os seus permisos, e vixiar que a súa explotación cumpra toda a normativa vixente.

Porque non queremos renunciar aos nosos dereitos civís, porque non queremos que nos rouben a nosa voz a base de demandas dos poderosos, desde ContraMINAcción queremos berrar forte e alto que hoxe e aquí nós tamén somos Marcos Celeiro.

Somos Marcos, e o vindeiro xoves estaremos con el diante do xulgado de Vigo, desde as 9 e media ata as 11, nunha concentración pacífica de apoio ao noso compañeiro, na que vos animamos a participar.

Non nos resignamos a que a lei sexa a lei do máis forte

Nin nos van calar, nin nos van parar.

 

Nova derrota nos xulgados de Cementos Cosmos en Triacastela

O xulgado de primeira instancia de Becerreá ven de fallar contra Cementos Cosmos, a cementeira do Grupo Votorantim, na segunda das tres demandas interpostas coas que esta multinacional realiza unha campaña de acoso e derribo contra José Horacio Rio Lago, membro da ASC O Iríbio, como represalia pola sua oposición á mina a ceo aberto en Triacastela.
Aínda á espera da celebración do xuízo pola terceira delas, con esta agora xa son dúas as demandas gañadas por este veciño e activista, que ao igual que outros, está a sofrer os durísimos ataques nos tribunais deste monstro empresarial e das súas potentes equipas da avogados, con falsas acusacións e fortes ataques económicos ás súas vítimas.
O xulgado de Becerreá fallou contra Cementos Cosmos

O xulgado de Becerreá fallou contra Cementos Cosmos

Nesta demanda, Cosmos pretendía “deshauciar” a José Horacio Rio Lago de dúas fincas da súa propiedade, unha delas da súa familia desde tempos inmemoriais e outra adquirida hai dúas décadas lindando co perímetro da explotación mineira. En máis de 30 anos de mina a ceo aberto, curiosamente só agora a empresa se lembrou de «reclamar» que son da súa propiedade. Ditas parcelas son irrelevantes e innecesarias para dita mina, embora son estratéxicas para a explotación agrícola familiar do demandado, polo que se pretende facer o máximo dano desde esta empresa. Amais do acaparamento de terras para facerlle perigar o seu medio de vida e sustento, Cementos Cosmos tentaba castigar economicamente ao denunciado, pois alén do valor desas terras e dos gastos xurídicos na súa defensa, pretendía interporlle custas superiores aos 18.000€.
Non obstante, Cementos Cosmos non conseguiu demostrar a propiedade desas terras, e o demandado si. A empresa presentou documentos correspondentes a outras parcelas que tentou facer pasar por documentos correspondentes ás parcelas en litixio e todo tipo de trapalladas documentais e testificais que foran fulminantemente desmontadas. As manobras realizadas por Cosmos neste xuízo poñen en evidencia as irregularidades – e incluso falsidades documentais – no procedemento da suposta expropiación forzosa que esta empresa realizou durante o franquismo cos privilexios que o réxime concedía aos seus amigos.
Este xuízo pode transcender enormemente o simple ataque contra José Horacio Rio Lago, pois o xulgado con isto tamén ven de dar a razón a case un cento de propietarios afectados por esta explotación mineira que se negan a abandonar terras que Cosmos se autoatribúe, ao consideraren que a suposta expropiación non é válida e que continúan a ser os lexítimos propietarios. O acoso de Cosmos, que non só está dirixido contra a ASC O Iríbio, senón tamén contra un cento de afectados directos, lonxe de intimidar, está a ter o efecto contrario en cada vez máis persoas, que alén do valor económico dos bens que lles pretenden usurpar, están a defendelos tenazmente xa simplemente por unha cuestión de dignidade e non se axeonllar ante os abusos e intimidacións constantes.
Esta pequena vitoria, a segunda nos ataques a José Horacio, é unha grande vitoria para toda a veciñanza, que comeza a ver que a agresividade desta monstruosa empresa é debida a que está ferida de morte e a firmeza e constancia, a verdade e a razón, poden vencer até aos máis ricos e poderosos.

Cementos Cosmos continúa acosando nos tribunais aos opositores á súa mina en Triacastela

Na pasada semana, José Horacio Rio Lago, veciño do Castiñeiro (Triacastela) e membro da ASC O Iribio, ven de recibir notificación dunha nova denuncia por parte de Cementos Cosmos, a terceira que esta empresa lle pon nos últimos dous anos.

Este é un novo episodio na campaña de acoso nos tribunais que Cosmos realiza contra os seus opositores en Triacastela, que inclúe unha demanda por «atentar contra o seu honor» contra o presidente da ASC O Iríbio, Marcos Celeiro, así como diversos burofaxes ameazantes que recibiran nos últimos meses diversos veciños de Vilar, Vila Vella, O Castiñeiro e O Teixo para «preparar o camiño» a denuncias contra eles; así como denuncias na Confederación Hidrográfica Miño-Sil a case un cento de veciños regantes do rio de Teixido por «usurpar» a auga de dito río, que esta empresa considera súa alegando que conta con unha concesión de augas a 20 anos, da cal os veciños non teñen noticia, na que prevalece o uso industrial sobre o uso agrícola, pretendendo deixar sen rego a todos os prados da ribeira do rio de Teixido, pertencentes a seis aldeas. Alén diso, existen outras denuncias que finalmente foran retiradas despois de «negociar» cos denunciados e eles teren acatado «amistosamente» os ditados da empresa.

Todas estas denuncias, con nulos ou ridículos fundamentos, o que pretenden é intimidar e facer desistir da súa loita aos veciños directamente afectados polas actividades mineiras e o acaparamento e usurpación de terras, camiños e augas que Cementos Cosmos realiza. Son denuncias selectivas, contra as persoas que consideran incómodas e vulnerábeis, e provocan serios quebradeiros de cabeza e gastos económicos nos denunciados, aínda que gañen os xuízos. Van acompañadas de peticións económicas desmesuradas e custos xurídicos inchados ao máximo contra as persoas que máis problemas económicos teñen, amais de fortes campañas de desprestixio dos denunciados no seu ámbito local.

jh

A vítima desta última denuncia, José Horacio Rio Lago, é un veciño do Castiñeiro, a aldea máis afectada pola mina a ceo aberto que xa leva destruído case a metade do seu espazo agrícola. Para comprar o silencio ante os abusos, Cementos Cosmos deu emprego ben pago aos veciños do Castiñeiro, entre eles a José Horacio, membro dunha familia que posúe unha explotación gandeira à que xa lle levan destruído boa parte das terras. Como este veciño deixou de calar, foi despedido. E ao deixar de estar suxeito á chantaxe que existía mentres durou a súa relación laboral, pasou a exercer oposición contra os abusos desta empresa, e nese momento comezaron tamén as represalias.

Primeiro acusárono falsamente de ter destruído un tramo do valado perimetral da explotación (que a propia empresa retirou), demanda que gañou, con sentenza ao seu favor, ao se demostrar que tal acusación era falsa. Non obstante, creáronlle todo tipo de prexuízos e foi marcado publicamente como «delincuente», pois tentaron facer ver diante dos outros veciños que o seu posicionamento no conflito de Cosmos se debía a vinganzas por ser despedido.

Na segunda demanda contra el, cuxa vista se celebrou esta semana, acúsano de «usurpar» a propiedade de Cementos Cosmos ao continuar o uso agrícola dunha parcela propiedade da súa familia desde tempos inmemoriais e outra que compraron dúas décadas atrás (estando xa a mina de Cosmos) cuxa propiedade se autoatribúe agora Cosmos dicindo que esas dúas parcelas foran expropiadas, ora sen achegar a documentación que demostre tal cousa. A acusación pídelle que abandone as parcelas e 18.000€. Esta demanda está pendente da sentenza.

Nesta terceira demanda pretenden demolerlle un cabanote-corte onde se resgardan as vacas cachenas da explotación familiar, alegando tamén que o terreo onde está é propiedade Cementos Cosmos e que o demandado o «usurpa», a pesar de que nunca foi expropiado, de que a súa familia ten escrituras, e de que anos atrás a empresa tentou comprarllo á súa familia en dúas ocasións.

Tanto nesta última demanda como na anterior, é agora, mais de 30 anos despois de que Cosmos iniciara as súas actividades mineiras, que dita empresa reclama esas propiedades que desde sempre e de xeito continuado ven utilizando a familia do demandado.

Todas estas accións xurídicas, antes do que os fins que se manifestan nas demandas, o que realmente pretenden é causar problemas aos demandados, facéndolles perder diñeiro e tempo, desprestixiando a súa imaxe pública e intimidando ao resto dos veciños para que vexan o que lles pode pasar se dan a cara contra Cosmos.

Ante esta situación, a ASC O Iríbio, na súa última asemblea xeral celebrada en outubro deste ano, acordou dar soporte xurídico a través da asociación aos socios que sufran este tipo de acoso, e crear un fondo solidario para sufragar os gastos da defensa dos denunciados neste tipo de conflitos. A este fondo será incorporados os donativos a tal efecto que se fagan na conta da ASC O Iríbio (conta ES23 2080 0188 5330 4000 4423), así como o diñeiro sobrante (en caso de que o houber) dos donativos para a defensa xurídica de Marcos Celeiro (conta ES93 2080 0146 7330 0002 4181).

Desde ContraMINAcción manifestamos o noso apoio à veciñanza de Triacastela e ás compañeiras e compañeiros da ASC O Iríbio, así como a nosa repulsa a este tipo de prácticas totalmente mafiosas, e esperamos que os tribunais estean á altura das circunstancias, nun contexto que non é de conflitos entre particulares, senón nun conflito social, e que demostren a imparcialidade e independencia dos poderes económicos e políticos.

NOTA: Dado que varios dos procesos xurídicos están en curso, non se farán mais declaracións aos medios do que aquí se comunica.

O concello de Triacastela anula a licenza municipal outorgada a Cementos Cosmos

Castinheiro_LRO Concello de Triacastela ven de comunicar a varios dos colectivos integrados en ContraMINAcción que interpuxeran recursos de reposición contra a polémica licenza municipal outorgada a Cementos Cosmos en dito concello no pasado día 1 de agosto, a desestimación dos mesmos por estar xa anulada dita licenza.

En dita resolución, o Concello de Triacastela desestima os recursos «pola desaparición sobrevida do obxecto do seu recurso, debido á anulación da licenza pola falta de quorum». Ou sexa, dita administración anula a licenza antes de entrar a valorar os recursos de reposición contra ela, porque o propio Concello recoñece que foi outorgada por ditado da Xunta de Goberno Local contra o seu propio regulamento, nunha sesión da mesma onde só estaban presentes a señora alcaldesa, Olga Iglesias Fontal, e o señor concelleiro Bautista Arias Pombo.

Nun concello onde todo se fai irregularmente -cando non directamente de xeito ilegal- en constantes e preocupantes chapuzas administrativas, danse situacións tan surrealistas como esta, onde se outorga unha polémica licenza con total arbitrariedade e todo tipo de irregularidades na súa tramitación e no seu cumprimento -por exemplo, permitíndose desde o Concello que Cementos Cosmos traballe sen respectar as medidas correctoras que eles mesmos dictan e facendo caso omiso das denuncias por eses feitos-, para logo a alcaldesa pasar meses defendendo nos xornais que a licenza foi outorgada «axustándose estrictamente á legalidade», e finalmente ela mesma anulala por non se axustar a nada, nen sequera ao funcionamento do seu propio goberno municipal.

Tanto o outorgamento como a anulación desta licenza municipal son totalmente irregulares e sospeitosas, polo que desde ContraMINAcción non se baixará a garda un instante e realizaranse todas aquelas accións administrativas e xurídicas que se consideren oportunas. Por agora foi solicitada a correspondente documentación ao Concello de Triacastela para estudar en detalle toda esta trapallada e actuar en consecuencia, ao tempo de vixiar que non se realicen mais actividades estando a licenza anulada.

 

‘O Iribio’ denuncia á explotación mineira de Cementos Cosmos ante a Policía Autonómica

A asociación vén de informar sobre o incumprimento dos requisitos e condicións de obrigado cumprimento que establece a licencia outorgada a nivel municipal e a total inacción do Concello de Triacastela para facelas cumprir.

Aínda que a citada autorización activouse o pasado 1 de agosto, non foi ata 12 días despois e tras abondosas dificultades impostas polo Concello que ‘O Iribio’ puido consultar o expediente de maneira completa, a partires do que, tras a análise detida do texto, solicitou á autoridade municipal a inmediata paralización da actividade de Cementos Cosmos na canteira de Vilavella ao constatar o flagrante incumprimento da filial de Votorantim dos condicionantes impostos ás tarefas mineiras.

A licenza establece que determinadas cuestións son previas ao reinicio da actividade extractiva. Entre elas están diversas autorizacións previas da Confederación Hidrográfica Miño-Sil, que aínda non foran concedidas, como a autorización para o vertido de augas no cauce do río de Teixido, a preceptiva autorización para actividades e obras dentro do Dominio Público Hidráulico, un proxecto que contemple medidas estabilizadoras de taludes, un proxecto para sistemas de drenaxe e depuración das augas de escorrentía ou a execución dun expediente sancionador pola afectación directa de Cementos Cosmos ao dominio público hidráulico. Doutra banda, a licenza municipal tamén esixe a presentación na Dirección Xeral de Patrimonio Cultural dun «Plano de protección e conservación do xacemento arqueolóxico da Cova de Eirós», por agora inexistente, ao igual que un novo proxecto de explotación que se axuste aos criterios de protección do Camiño de Santiago, que deberá ser verificado e autorizado por dito organismo.

Instalacións de Cementos Cosmos en Triacastela

Instalacións de Cementos Cosmos en Triacastela

Dende a Asociación ‘O Iribio’ solicitouse ao Concello de Triacastela o exercicio efectivo das súas competencias en materia urbanística, esixindo o cumprimento do disposto na Lei do Solo (Lei 9/2002 e sucesivas modificacións) e no Regulamento de Disciplina Urbanística (Decreto 28/1999) que obriga á suspensión inmediata das actividades que non se axusten ao disposto na licenza municipal, a incoar un expediente de reposición da legalidade e a adoptar medidas cautelares coa a suspensión dos subministros de auga, electricidade, telefonía e incluso o precintado das instalacións en caso de reincidencia. Legalmente, estas son medidas de aplicación inmediata que a alcaldía tería que executar de oficio nun prazo máximo de 24 horas.

Sen embargo, a alcaldesa de Triacastela, Olga Iglesias Fontal, desatende a petición da asociación e segue a permitir a actividade mineira de Cementos Cosmos en condicións de ilegalidade, ao non axustarse ao que ela mesma dispuxo días antes.

DENUNCIA ANTE A POLICÍA AUTONÓMICA

Ante esta situación, o día 18 de agosto ‘O Iribio’ denunciou os feitos diante da Policía Autonómica de Lugo, á que corresponden as competencias de ámbito urbanístico como a a inspección das actividades sometidas á ordenación ou disciplina da Comunidade Autónoma, neste caso o incumprimento do disposto na licenza municipal.

A día de hoxe, a policía autonómica inspeccionou as actividades de Cementos Cosmos en Triacastela, e entregóuselle por parte da asociación diversa documentación para axuntar a dita denuncia.

Dende a Asocciación Socio-Cultural O Iribio denunciamos o constante trato de favor das institucións públicas a Cementos Cosmos ao permitirlle todo tipo de ilegalidades mediante políticas de «feitos consumados» nas que denuncias, demandas de inspeccións e peticións de información constantemente son desatendidas.

Triacastela, 20 de agosto de 2014

 

 

 

Colectivos de ContraMINAcción recorren a licenza outorgada a Cementos COSMOS.

Dous colectivos integrados en ContraMINAcción presentaron xa cadanseu recurso de reposición contra a licenza concedida polo Concello, solicitando a súa suspensión inmediata. Nos vindeiros días presentaranse novos recursos por parte de outros colectivos da nosa Rede.

Nos recursos, presentados polos colectivos Cova Crea e Petón do Lobo, exíxese a suspensión inmediata da licenza concedida á empresa Cementos Cosmos, así como a revisión da mesma, por entender que reviste o carácter de acto administrativo nulo de pleno dereito.
Desde os colectivos alegantes explican que o recoñecemento administrativo por parte da Dirección Xeral de Industria, Enerxía e Minas, limítase ao proxecto de explotación e plan de restauración vixente a 1 de xaneiro de 2003, non podendo ser obxecto de recoñecemento administrativo as ampliacións ou modificacións posteriores a esa data.

Aldea de Castiñeiro, en Triacastela

Aldea de Castiñeiro, en Triacastela

Ao tratarse dun proxecto diferente do anteriormente aprobado (distinto nome, distintas concesións, maior envergadura, maiores impactos e incluso distinto tipo de recursos a explotar), precisaría, para ser levado a cabo conforme a lexislación vixente, da correspondente avaliación ambiental, así como da análise dos impactos directos e indirectos da actividade na área na que se desenvolve. Así pois, non se trata dunha simple regularización dunha actividade extractiva xa existente.

Desde ContraMINAcción queremos recordar á opinión pública que a explotación en cuestión atópase enriba da Cova de Eirós, onde se fixeron importantísimos achádegos arqueolóxicos, sendo considerada unha auténtica xoia da arte rupestre, ata o punto de ser bautizada como a “Atapuerca galega”.

As actividades mineiras danan gravemente este xacemento arqueolóxico, producindo filtracións de auga que danan as pinturas, así como as voaduras e detonacións no seu entorno inmediato, como o propio departamento de Patrimonio Cultural recoñece, a pesar de informar favoravelmente permitindo detonacións a só 50 metros da Cova de Eirós.

Tamén é necesario lembrar que esta mina se encontra sobre o leito fluvial do rio de Teixido, en Rede Natura nun ámbito con varias ducias de especies protexidas, no ámbito de protección do Camiño de Santiago, e afecta cinco aldeas e as vías de comunicación entre elas. A pesar diso, foi outorgada unha licenza sen avaliación dos impactos dun xeito totalmente irregular no procedemento e contra o máis elemental senso común.

Os colectivos Cova Crea e Petón do Lobo, ademais da nulidade da licenza, solicitan como medida preventiva, dada a importancia histórica desta parte do noso patrimonio, a paralización inmediata da explotación e a suspensión da autorización para o exercicio da actividade.

Outros colectivos integrados na rede ContraMINAcción preparan novos recursos de reposición que irán presentando nos vindeiros días.

Alegacións ao intento de legalización da mina a ceo aberto de Triacastela

Triacastela

Triacastela

A rede de colectivos contra minaría destructiva ContraMINAcción presentou alegacións no trámite administrativo iniciado no Concello de Triacastela para tentar legalizar a mina a ceo aberto que Cementos Cosmos S.A. veu explotando de forma ilegal durante as últimas catro décadas e que neste momento se encontra paralizada por non contar con licenza municipal, sendo esta só unha das innúmeras ilegalidades e irregularidades desta canteira de pedra caliza para a fabricación de cemento.

Este trámite consiste nunha nova solicitude de licenza municipal ao abeiro da disposición transitoria 12ª  da Lei do Solo feita no seu día para legalizar as canteiras ilegais, ademáis dunha tentativa de saltar a avaliación ambiental dos impactos en virtude a outra disposición adicional do decreto 133/2008, o cal que xa non está actualmente en vigor.

Todo este procedemento é escandaloso, pois ademáis das trapalladas e da búsqueda de fisuras na lexislación para legalizar unha auténtica barbaridade, desde un punto de vista administrativo a prepotencia da empresa é tal que nen sequera garda as formas, con omisión de documentación, falsidade na que se presenta, e tantas irregularidades que a simple admisión a trámite demostran o servilismo e colaboracionismo da administración cas mafias mineiras e a súa total falta de respeito aos veciños directamente afectados e aos direitos da cidadanía en xeral, ao medio ambiente, ao patrimonio, e como non, á legalidade. Para ilustrar a situación, é un trámite de avaliación ambiental onde nen sequera o solicitante presenta un estudo de impacto ambiental, e onde nen sequera existe o documento do proxecto mineiro para o que se solicita a licenza urbanística.

Ademáis das irregularidades na forma, o fondo ainda é máis vergoñoso, pois preténdese conceder licenza urbanística de forma automática e sen ningunha avaliación ambiental para unha concesión mineira en recursos C) de 11 cuadrículas mineiras que poderían borrar do mapa varias aldeas, incluíndo ducias de vivendas na súa demarcación e dando direitos de expropiación forzosa sobre elas e centos de hectáreas de territorio, principalmente terras agrícolas de primeira calidade, deixando sen viabilidade case un cento de explotacións agrícolas familiares se isto se autoriza. Por se fora pouco, destruiría fisicamente un río e toda a súa bacía fluvial de prados de regadío. Resulta alarmante que Cementos Cosmos xa conte unha concesión de auga e outra de verquidos sobre ese río, feito descoñecido polos veciños da zona antes de se ter iniciado este expediente. A cousa ainda non fica ahí, pois tamén destrue fisicamente 6 camiños que forman parte do dominio público obrigando aos seus usuarios da dar un rodeo de 12 Km para comunicarse con lugares a menos de 2 Km, creando un buraco de quilómetros facendo de barreira insalvábel no territorio.

A concesión mineira tamén afecta a Rede Natura, encontrándose no LIC Ancares-Courel, pero isto tentan salvalo definindo un perímetro mineiro que se retira da súa delimitación. Ainda así, na área onde se solicita legalizar definitivamente esta canteira, hai hábitats prioritarios e várias ducias de especies de flora e fauna protexidas, feito que Cementos Cosmos oculta, e frente ao cal a administración olla para outro lado. O dano medioambiental é terrorífico, e o que pretenden é que non se avalíe.

Por se fora pouco, no referente ao patrimonio, esta canteira sitúase fisicamente sobre o xacemento arqueolóxico da Cova de Eirós, onde ademais de seren achados nela  importantes restos paleontolóxicos e arqueolóxicos se encontram as primeiras pinturas rupestres galegas, estando encontradas até o momento un total de 94, ainda que non se descartan novos descubrimentos. Ademáis da Cova de Eirós, na área están outras 3 covas que ainda non foran estudadas e que serían totalmente destruídas. Todos estes feitos son ocultados, tanto por parte do socilitante, Cementos Cosmos, como por parte dos informes técnicos do Concello de Triacastela, como por parte da Dirección Xeral de Patrimonio. O único patrimonio que se cita é o Camiño de Santiago, ao pé do cal se encontra esta mina a ceo aberto, de desde o cal xa agora crea un impacto paisaxístico brutal durante quilómetros. A falta de escrúpulos é tal, que a empresa recoñece que o impacto sobre o Camiño de Santiago é tan negativo e de tal magnitude que non se pode evitar, polo que propón como medida correctora «potenciar a visión da canteira» e facer un mirador sobre ela cun panel informativo louvando os beneficios da minaría.

Desde ContraMINAcción consideramos que non podemos deixar que destrúan a nosa terra, a nosa economía sustentábel e o noso patrimonio deste xeito, e que por riba cando mexan por nós teñamos que dicir que chove. Consecuentemente, se este procedemento de legalización no Concello de Triacastela non se anula inmediatamente, iniciaremos todas as accións xurídicas que consideremos oportunas.

Galiza non é unha mina! A loita continúa!

Pincha para acceder ao documento das alegacións